گه‌ڕان

Shadow Shadow
سیاسه‌تی

ناس كورد وردەكاری چارەنوسی دەستگیرکراوەکانی دوێنێی دهۆک بڵاودەكاتەوە

2020.05.17 - 14:45
ناس كورد وردەكاری چارەنوسی دەستگیرکراوەکانی دوێنێی دهۆک بڵاودەكاتەوە

ناس کورد-

تا ئێستا 14 چالاكی خۆپیشاندانەكەی دوێنێی شاری دهۆك لە زینداندا ماونەتەوە و بەیاسای خۆپیشاندان ڕاگرتنیان دریژكراوەتەوە، بەڕێوەبەرێكی ڕێكخراوێكی تایبەت بە مافەكانی مرۆڤ و برای یەكێك لە دەستگیركراوەكان دەڵێت، "چەند ڕێكخراوێكی مەدەنی هاوسۆزی دەستگیركراوانن و 12 پارێزەری خۆبەخشیش لە دادگا بەرگری لەو دەستگیركراوانە دەكەن."

 

حەمدی بەرواری کە برای بەدەل بەرواری و هاوكات بەڕێوەبەری ڕێكخراوێكی مافی مرۆڤ لە شارەكە تایبەت بەناس كوردی ڕاگەیاند، "بۆ كەیسی سەرجەم دەستگیركراوانی خۆپیشاندانەكەی دوێنێی شاری دهۆك ئەمڕۆ سەردانی دادگای شارەكەیان كردووە و داوای ئازادكردنی چالاكانی دەستگیركراویان كردووە."

 

وتیشی، "چالاكانی خۆپیشاندانەكەی دوێنێی شارەكە كە زیاتر مامۆستایان و موچەخۆرانن و ئێستا 14 كەسیان لە زینداندا ماونەتەوە، بەپێی مادەی 10ی یاسایی خۆپیشاندان ڕاگیراون و بڕیاری ڕاگرتنەكەشیان بۆ سبەێنێ درێژكراوەتەوە."

 

چالاكەكەی مافی مرۆڤی دهۆك باسی لەوەش كرد، نزیكەی 12 پارێزەر بە خۆبەخشی كار لەسەر كەیسی ئەو دەستگیركراوانە دەكەن و هەوڵی ئازادكردنیان دەدەن.

 

دوێنێ لەگەڵ دەستپێكردنەوەی خۆپیشاندان لە پاركی ئازادی شارەكە كە دەیان مامۆستا و موچەخۆری دهۆك بەشداریان تێدا كرد، هێزە ئەمنیەكان هێرشیان كردە سەر شوێنەكە و بڵاوەیان بە خۆپیشاندەران كرد.

بەوتەی چالاکانی مەدەنی لە دهۆک، زیاتر لە 100 كەس دەستگیركرا، زۆربەیان شەوی ڕابردوو ئازاد كران و یەكێكیشان ئەمڕۆ و ئەوانی تریش ماوەتەوە بۆ سبەینێ.

 

لەبارەی ئەگەری تری ئەنجامدانی خۆپیشاندان لە شارەكە، بەرپرسەكەی ڕێكخراوی مافی مرۆڤ وتی، "بەهۆی ئەوەی سەرقاڵی كاروباری دادگا بووم ئاگام لە هیچ بەرنامە و جموجۆڵێكی تری شارەكە نییە كە خۆپیشاندان ئەنجامبدەن."

 

زیاتر بخوێنەوە: دهۆک؛ خۆپیشاندان کۆتایی پێهێندرا و زیاتر لە 100 کەس دەستگیرکران

زیاتر بخوێنەوە: ڕێکخەرێکی تری خۆپیشاندانەکانی دهۆک دەستگیرکرا.. پۆلیس لە ماڵەوە بردوویانە

 

دوای ئەوەی ڕۆژی هەینی گرتەیەكی ڤیدیۆی لە تۆڕە كۆمەڵایەتیەكانەوە بڵاوكردەوە و داوای لەمامۆستایان و موچە خۆرانی شارەكە كرد بەشداری خۆپیشاندانێكی شاری دهۆك بكەن، هەمان شەو هێزە ئەمنیەكان هەڵدەكوتنە سەر ماڵی بەدەل بەرواری و دەستگیری دەكەن و تا ئێستاش لەگەڵ 13 چالاكی تری خۆپیشاندانەكەی دوێنێی دهۆك لەزینداندایە.