گه‌ڕان

Shadow Shadow
سیاسه‌تی

تەندروستى جيهانى هۆشدارى دەداتە عێراق

2020.05.16 - 17:40
تەندروستى جيهانى هۆشدارى دەداتە عێراق

ناس کورد-

 

نوێنەرى ڕێكخراوى تەندروستیى جيهانى لە عێراق داوا دەكات كە ڕێوشوێنەكان بەرامبەر ئەوانەى لە دەرەوەى عێراق دێن توند بكرێنەوەو ماوەى 14 ڕۆژ كەرەنتين بكرێن، دەشڵێت، پێویستە سنور و فڕۆكەخانەكان قۆناغ بە قۆناغ بكرێنەوە.

 

ئەدهەم ئيسماعيل، نوێنەرى ڕێكخراوى تەندروستیى جيهانى لە لێدوانێكدا بە ئاژانسى فەرمى وتوە، لەسەر شانەى قەيرانەكان پێويستە كە چاو بە ڕێوشوێنەكاندا لەگەڵ ئەوانەى لە دەرەوەى عێراقەوە دێن بخشێنێتەوە.

 

باسى لەوەشكردوە، پرۆسەى كردنەوەى سنورەكان پێويستە قۆناغ بە قۆناغ بێت و فڕۆكەخانەكانيش بەهەمان شێوە، پێويستە گەشت تەنها بۆ ئەو ناوچانە بێت كە توشبووى كەميان تێدا تۆمار كراوە، ئەوەش لەگەڵ گرتنەبەرى ڕێوشوێنى توند لە بەندەرەكان و خاڵە سنوريەكان و دانانى تيمى تەندروستى و بەدواداچون و پشكنينى بەردەوام بۆ ئەوانەى دێنە عێراقەوە.

 

ژمارەى توشبوانى ڤايرۆسى كۆرۆنا لە عێڕاق بەردەوامە لەبەرزبونەوەو لە ماوەى چەند ڕۆژى ڕابردودا  و بەئێستاشەوە ڕۆژانە دەيان توشبوى نوێ تۆمار دەكرێن و ئەمەش ترسى لە بڵاوبونەوەى فراوانى ڤايرۆسەكە دروست كردوە و پێشتريش وەزارەتى تەندروستى و شانەى قەيرانەكانى پەرلەمان باسيان لە ئەگەرى دوبارە سەپاندنەوەى قەدەغەى گشتگيرى هاتوچۆ كرد.

 

بەپێى دواين ئامار كە وەزارەتى تەندروستى و ژينگەى عێراق بڵاويكردوەتەوە، ژمارەى گشتى توشبوان گەيشتوەتە 3193 كەس و لەو ژمارەيەش 117 يان گيانيان لەدەستداوە و 2089 توشبوش چاكبونەتەوە و 987 كەسيش لەژێر وەرگرتنى چارەسەردان.