گه‌ڕان

Shadow Shadow
سیاسه‌تی

ڕۆژنامەنوسانی حزبی موچەکانیان دوادەکەوێت

کۆمەڵەیەکی عێراقی: بەهۆی كۆرۆناوە هەزار ڕۆژنامەنووس لە كارەكانیان دەركراون

2020.05.16 - 16:27
کۆمەڵەیەکی عێراقی: بەهۆی كۆرۆناوە هەزار ڕۆژنامەنووس لە كارەكانیان دەركراون

ناس کورد-

كۆمەڵەی عێراقی بۆ بەرگریكردن لە مافی ڕۆژنامەنوسان ڕایگەیاند، بەهۆی قەیرانی كۆرۆناوە زیاتر لە هەزار ڕۆژنامەنوس و میدیاكار لە كارەكانیان دەركراون و ڕۆژنامەنوسانی حزبیش سێ مانگە موچەیان پێنەدراوە، سەرەڕای بەردەوامی توندوتیژییەكان لە دژیان.

 

بەهۆی ئەو قەیرانانەوە كە عێراقی پێدا تێپەڕدەبن، پێشێلکاری و بە ئامانجگرتنی ڕۆژنامەنوسان و میدیاكان بەردەوامە و چەند ڕۆژنامەنوسێکیش کوژراون، بەڵام لە سەردەمی کۆرۆنادا شێوازێکی تر لە پێشێلکاری هاتووەتە ئاراوە لە دژیان.

 

مەترسی مردن و لەدەستدانی پیشەكانیان و توندوتیژی لەدژیان كۆمەڵێك ڕوداون خەریكە ڕۆژنامەنوسانیان لەسەر ڕادێت، بەمدوایانەش بەهۆی ڕوبەڕووبونەوەی كۆرۆناوە دوو ڕۆژنامەنوسی عێراقی زیانیان پێگەیشت و ژمارەیەكی زۆریش پیشەكانیان لەدەستدا.

 

قەرزاری

ئیبراهیم سەڕاجی، سەرۆكی كۆمەڵەی عێراقی بۆ بەرگریكردن لەمافی ڕۆژنامەنوسان دەڵێت، زیاتر لە هەزار میدیاكار بەزۆرەملێ لەكارەكانیان دورخراونەتەوە.

 

باسی لەوەشكردووە، ئەو میدیاكارانە كە بەهۆی پیشەكانیانەوە دەركراون لە دەزگای سەربەخۆی و ئەهلیدا كاریان كردووە نەك دەزگای حكومی، ڕۆژنامەنوسانی دەزگا حزبییەكانیش ڕوبەڕووی كیشەی دواكەوتنی موچەكانیان بونەتەوە كە هەندێكیان سێ مانگە موچەیان پێنەدراوە و ئەوەش كاریگەری نەرێنیی هەبووە بۆ سەریان. 

 

سەڕاجی دەشڵێت، بەهۆی ڕاگرتنی كاری وەزارەتە حكومییەكانەوە كە قەرزاری  ژمارەیەكی زۆر لەدەزگا میدیاكانن تووشی قەرزاری بوون بەڕێژەی 50% و تا ڕێژەی 100%.

 

ئەوەشی خستووەتەڕوو کە بەهۆی نەدانەوەی قەرزەكانیانەوە، چەندین دەزگا لەشاری بەسرە ڕاگیراوە و ئەوەش بووەتە هۆی دەكردرنی هەزار ڕۆژنامەنوس و میدیاكار و بێكاربوونیان. 

 

توشبوون بە كۆرۆنا

بەوتەی بەرپرسی ئەو كۆمەڵەیە، دوو ڕۆژنامەنووس تووشی ڤایرۆسەكە بوون ئەوەش بەهۆی ئەنجامدانی پیشەكانیانەوە، ئەوانیش عەلی جبوری لە نەجەف و موهەند گەنزی خەڵكی شاری موسڵ كە وێنەگرە، چەند میدیاكارێكی تریش لەشاری نەینەوای بەگومانی توشبوون لە نەخۆشخانە خەوێنراون.

 

توندوتیژی 

سەڕاجی دەشڵێت، ئەو ماوەیە توندوتیژی زۆر لەدژی ڕۆژنامەنوسان ئەنجامدراوە، جگە لە ڕفاندنی دوو نوسەرەكە تا ئێستاش چارەنوسیان نادیارە.

 

لەكۆتای وتەكانیدا سەرۆكی كۆمەڵەی عێراقی داواش لە سەرۆكی كابینەی نوێ دەكات، دۆسیەی تاوان لەدژی تۆمەتبارانی دژ بە مافی ڕۆژنامەنوسان بكاتەوە و هەوڵی ڕاگرتنی توندوتیژییەكان بكات كە بوونەتە گرفتێكی گەورەی بەردەم كارەكەیان و نەهامەتیەكی گەورەش بۆ خێزانەكانیان.

 

بەپێی ئاماری ئەو كۆمەڵەیە، زیاتر لە 100 ڕۆژنامەنوس هەر لەكاتی خۆپیشاندانەكانەوە تا ئێستا ڕوبەڕووی هەموو جۆرە توندوتیژیەك كراونەتەوە.