گه‌ڕان

Shadow Shadow
سیاسه‌تی

بەرپرسێك هۆشدارى دەدات: بەهۆى كۆرۆناوە زستانێكى زۆر تاريكتر چاوەڕێى ئەمريكا دەكات

2020.05.14 - 18:23
بەرپرسێك هۆشدارى دەدات: بەهۆى كۆرۆناوە زستانێكى زۆر تاريكتر چاوەڕێى ئەمريكا دەكات

ناس کورد-

 

ڕيك برايت كە بەرپرسێكى تەندروستى ئەمريكيە دەڵێت، لەوانەيە ساڵى 2020 زستانێكى تاريكتر ڕوو لە ئەمريكا بكات كە چەندين دەيەيە بەو شێوەيە نەبوبێت، ئەويش ئەگەر شكستهێنرا لە دوۆزينەوەى چارەسەرێك بۆ ڕوبەڕوبونەوەى ڤايرۆسى كۆرۆنا.

 

ڕيك بڕيارە لە بەردەم كۆنگرێسى وڵاتەكەى ئامادەبێت و سەبارەت بە قسەكانى كە پێشتر ئامادەكراوە و ڕادەستى كۆنگرێسى كردوە ئاماژەى بەوەداوە: "دەرفەتمان بەرتەسك بوەتەوە ئەگەر شكستمانهێنا لە وەڵامدانەوەيەكى نيشتمانى كە پشتى بە زانست بەستبێت، ترسى ئەوەم هەيە بارودۆخەكە لەوە خراپتر ببێت و ماوەى مانەوەى نەخۆشيەكە زۆر زياتر بێت و ژمارەى قوربانيەكان زۆر زياد بكەن". 

 

رونيشيكردوەتەوە: "بەبێ پلانێكى ئاشكرا و جێبەجێكردنى و هەروەها ئەو هەنگاوانەى كە من و شارەزايانى تر دياريمان كردوە ساڵى 2020 زستانێكى زۆر تاريكتر چاوەڕێى ئەمريكا دەكات كە لەوانەيە تاريكترين بێت لەمێژودا". 

 

پێشتر برايت بەتۆمەتى دژايەتيكردنى ئەو دەرمانانەى كە دۆناڵ ترامپ، سەرۆكى ئەمريكا پڕوپاگەندەيان بۆ دەكات وەك چارەسەرى كۆرۆنا پلەكەى كەمكرايەوەو پێى وايە، هيچ يەكێك لەو چارەسەرانە بە زانستى نەسەلمێنراون.

 

پێشتريش هۆشدارى دابوو لە كەمى پێداويستى پزيشكى لە ئەمريكا، بەڵام هۆشداريەكانى پشگوێ خرابون، هەروەها مانگى ڕابردوو لە پۆستەكەى وەك سەرۆكى دەستەى لێكۆڵينەوە و گەشەپێدانى پێشكەوتوو بۆ پزيشكى زيندەيى "باردا" لابرا كە ئاژانسێكە بۆ گەشەپێدانى ڤاكسينى دژە كۆرۆنا و تێچوەيەكى زۆرى هەيە، گواسترايەوە بۆ پۆستێكى تر كە گرنگيەكەى كەمترە كە ئەويش پەيمانگاى نيشتمانى بۆ تەندروستيە.

 

بڕيارە برايت لە قسەكانيدا لەبەردەم كۆنگرێس باس لەوەش بكات كە "بەشێوەيەكى ئاشكرا و ئازاربەخش" ئەمريكا ئامادە نەبوو بەو شێوەيەى كە پێويست بوو، هەروەها گرنگى بە هۆشداريە پێشوەختەكان نەدا و پەيجە گرنگەكانى كتێبەكانى دياريكردنى رێوشوێنمان بۆ بەرەنگاربونەوەى پەتا پەراوێزخست.

 

ئەمريكا زەرەرمەندترين وڵاتى جيهانە بەهۆى ڤايرۆسى كۆرۆناوە و لەكۆى زياتر لە 4 مليۆن و 460 هەزار توشبوو و نزيكەى 300 هەزار گيان لەدەستدان، مليۆنێك و 432 هەزار توشبوو و زياتر لە 85 هەزار گيان لەدەستدان لەو وڵاتە تۆمار كراوە.