گه‌ڕان

Shadow Shadow
سیاسه‌تی

وەزیری ناوخۆ: سەرۆکی حکومەت زۆر خەمی موچەخۆرانییەتی بەڵام توانای حکومەت هەر ئەوەندەیە

2020.05.14 - 17:31
وەزیری ناوخۆ: سەرۆکی حکومەت زۆر خەمی موچەخۆرانییەتی بەڵام توانای حکومەت هەر ئەوەندەیە

ناس کورد-

وەزیری ناوخۆی هەرێم ڕایگەیاند، هەرێمی کوردستان لە قەیرانی داراییدایە، دەشڵێت سەرۆکی حکومەت زۆر خەم لە موچەخۆران و هاووڵاتیان دەخوات، بەڵام توانای دارایی حکومەت هەر ئەوەیە و بە شەفافی دەیڵێن.

 

لە میانی کۆنگرەیەکی رۆژنامەوانیدا دەربارەی ڕێکارەکانی بەرەنگاربوونەوەی ڤایرۆسی کۆرۆنا، ڕێبەر ئەحمەد، وەزیری ناوخۆی حکومەتی هەرێم ڕایگەیاند: "بەرپرسیارێتی حکومەتی هەرێم لێرەوە کۆتایی دێت و دەکەوێتەسەر هاووڵاتیان، ئەوەی لەسەر ئێمە بوو کردمان، ئیتر هاووڵاتی خۆی لە ژیانی خۆی بەرپرسە، چونکە ئێمە لەوە زیاتر هیچیترمان لەدەست نایەت و توانای مادی پێویستیشمان لەبەردەست نییە".

 

وتیشی، بارودۆخی ئابوری نالەبارە و هۆکارەکانیشی دیارە کە دابەزینی نرخی نەوت و نەبوونی داهاتی ناوخۆ و بڕیارێکی سیاسی لە بەغدا بە ڕاگرتنی شایستە داراییەکانی هەرێمە.

 

وەزیری ناوخۆی هەرێم ئاماژەی بەوەشکرد: "ئەنجومەنی وەزیران و سەرۆکی حکومەت زۆر خەمی موچەخۆرانیانە، خەمی ئەو هاووڵاتیانەیانە کە بارودۆخی ژیانیان باش نییە، خەمی خەڵک خەمی ئێمە و لێی تێدەگەین، بەڵام توانای دارایی ئەم حکومەتە هەر ئەوەندەیە".

 

ڕێبەر ئەحمەد باسی لەوەشکرد: "ئێمە زۆر ڕاستگۆ و شەفافین لەگەڵ خەڵکی خۆمان، لەبابەتی کۆرۆنا زۆر بە راستگۆیی مامەڵەمان کرد، لەبابەتی داراییش هەروادەکەین و کردوومانە، هیواداریشین بەزووترین کات و بە کەمترین زیان لە قەیرانی داراییش تێپەڕین ".