گه‌ڕان

Shadow Shadow
سیاسه‌تی

وەک کردارێکی جەنگی دژ بە ئەمریکا هەژمار دەکرێت

ئەمریکا: چین و ئێران هەوڵى هاککردنى توێژینەوەکانمان دەدەن لەبارەى کۆرۆناوە 

2020.05.13 - 21:42
ئەمریکا: چین و ئێران هەوڵى هاککردنى توێژینەوەکانمان دەدەن لەبارەى کۆرۆناوە 

ناس کورد-

دەزگا ئەمنی و هەواڵگرییەکانی ئەمریکا، هۆشداریاندا لە هەوڵەکانی چین و ئێران بۆ هاککردنی زانیاری و توێژینەوە زانستییەکانی دامەزراوە ئەمریکییەکان کە لەئێستادا سەرقاڵی دۆزینەوەی چارەسەرن بۆ ڤایرۆسی کۆرۆنا.

 

 

نوسینگەی لێکۆڵینەوە فیدراڵییەکان و وەزارەتی ئاسایشی نیشتیمانی ئەمریکا لە ڕاگەیەندراوێکدا بە فەرمی وڵاتی چینیان تۆمەتبارکرد بەهەوڵدان بۆ دزین و هاککردنی زانیارییە پزیشکییەکانی ئەمریکا تایبەت بە دۆزینەوەی چارەسەر بۆ ڤایرۆسی کۆرۆنا.

 

لەڕاگەیەندراوەکەدا ئەو دوو دەزگا ئەمنییەی ئەمریکا هۆشداریشیان بەو لایەن و ڕێکخراوە ئەمریکیانە داوە کە لە ئێستادا سەرقاڵی توێژینەوەن بۆ دۆزینەوەی ڤاکسین و چارەسەر بۆ پەتای کۆرۆنا لە ئەگەری هێرشی ئەلکترۆنی بۆ سەر دامەزراوەکانیان لەلایەن هاککەرانەوە .

 

هاوکات ڕۆژنامەی "وۆڵ ستریت جۆڕناڵ"ی ئەمریکی لە هەواڵێکیدا ئاماژەی بەوەکردووە کە بەرپرسانی ئەمنی ئەمریکا ڕایانگەیاندوە "لە سەرەتای مانگی کانوونی دووەمی ڕابردوەوە هاکەرە چینییەکان و ئێرانییەکان چالاکییەکان لە دزەکردن بۆ ناو پڕۆگرامی ئەلکترۆنی زانکۆکان، کۆمپانیاکانی دروستکردنی دەرمان و ڕێکخراوە زانستییەکانی ئەمریکا کە لە ئێستادا سەرقاڵی دۆزینەوەی چارەسەرن بۆ ڤایرۆسی کۆرۆنا زیادیان کردوە.

 

ڕۆژنامەی وۆڵ ستریت جۆڕناڵ، ئەوەشی خستوەتەڕوو، پێدەچێت دوناڵد ترەمپ، سەرۆکی ئەمریکا ئەو هێرشە ئەلکترۆنیانەی کە چین و ئێران دەیکەنە سەر دامەزارە زانستی و پزیشکییەکانى ئەمریکا وەک کردارێکی جەنگی دژ بە ئەمریکا هەژمار بکات، چونکە ئەو هێرشانە دەبنە هۆکاری لەمپەر لە بەرەوپێشچوونی توێژینەوەکان سەبارەت بە دۆزینەوەی ڤاکسین بۆ ڤایرۆسی کۆرۆنا.

 

ڕۆژنامە ئەمریکییەکە ئاماژەی بەوەشداوە، ئیدارەی سەرۆکی ئەمریکا، لە ماوەی ڕابردوودا زانیاری هەواڵگری تەواوی دەربارەی هەوڵەکانی ئێران بۆ هێرشکردنی ئەلکترۆنی بۆ سەر دامەزراوەکانی ئەمریکا کۆکردوەتەوە.