گه‌ڕان

Shadow Shadow
سیاسه‌تی

’چەندین جار هەڕەشەى کوشتنیان لێکردووم’

تاقانەکەى ئەنفال نامەیەکی ئاڕاستەی چەند لایەنێکی نێودەوڵەتی کرد

2020.05.11 - 15:39
تاقانەکەى ئەنفال نامەیەکی ئاڕاستەی چەند لایەنێکی نێودەوڵەتی کرد

ناس کورد-

تەیموری ئەنفال، تاقانە ڕزگاربووەکەی شاڵاوەکانی ئەنفال لە خێزانەکەیدا نامەیەکی ئاڕاستەی لایەنە نێودەوڵەتییەکان کرد و تیایدا چەند داواکارییەکی خۆیی و کەسوکاری ئەنفالی خستووەتەڕوو، دەشڵێت، چەندین جار هەڕەشەی کوشتنیان لێکردووە و ژیانی لە مەترسیدایە.

 

 

تەیمور عەبدوڵا ئەحمەد، ناسراو بە تەیموری ئەنفال کە یەکێکە لە تاقانەکانی ئەنفال و تاکە ڕزگاربووی گۆڕە بەکۆمەڵەکانی سەماوەیە نامەیەکی ئاڕاستەی نێردەی تایبەتی نەتەوەیەکگرتوەکان لە عێراق - جنین هینیس بلاسخارت، نوێنەرایەتیە جیهانیەکان لە عێراق و هەرێمی کوردستان و ڕێکخراوە جیهانیەکانی بواری مافەکانی مرۆڤ، کرد.

 

لە نامەکەدا هاتووە: "من (تەیمور عەبدوڵا ئەحمەد) تاکە ڕزگاربوی ناو گۆڕە بە کۆمەڵەکانی ئەنفال کە هەموو ئەندامانی خێزانەکەم و تەواوی خزم و کەسوکارم بە پێش چاومەوە لە شاڵاوە چەپەڵەکانی ئەنفالدا لە بیابانی سەماوە زیندەبەچاڵکراون، ژیانی من سەرگوزشتەی بەشێکی زۆر لە میدیا جیهانیەکان و ناوەندەکانی جینۆساید بوە".

 

ئاماژەی بەوەشكرد: "ماوەی زیاتر لە حەوت ساڵە چەند داواکاریی سەرەکیم لە سەرکردایەتی سیاسی کورد و سەرۆکایەتیە عێراقیەکان هەیە، وەک بەشێکی گرنگ لە خزمەت و گەڕاندنەوەی بەها بۆ کەسوکاری سەربەرزی ئەنفال و شەهیدان کە خۆی لە چەند خاڵێکدا دەبینێتەوە".

  

لە نامەکەدا تەیمور ئەم خاڵانەی ئاڕاستەی ئەو سێ لایەنە کردووە:

 

یەکەم: حکومەتی عێراق بە فەرمی داوای لێبوردن لە گەلی کوردو کەسوکاری زیاتر لە 200 هەزار زیندە بەچاڵکراو بکات.

 

دووەم؛ بە هیچ شێوەیەک ڕازی نین گۆڕە بەکۆمەڵەکان و کاسە سەرو جەستەی پیرۆزی کەسوکارمان بهێنرێنەوە بۆ خاکی نیشتیمان و هەرێمی کوردستان، چونکە خوازیارین بە حورمەتەوە بهێنرێنەوە، نەک لەکاتێکدا هێشتا جاش و ئەنفالچیەکان لەوپەڕی دەستڕۆیشتویدان و چەندین جار هەڕەشەی کوشتنیان لێ کردووم، جگە لەوەش یەک کۆمەڵ خەڵکی هەلپەرست و زمان لووس خۆیان بەم کەیسەدا هەڵواسیوەو کەسابەتی پێوە ئەکەن لە ئاستی جیاجیاو لە ژێر ناوی جیاجیادا.

 

سێهەم؛ خەباتی منی تاقانەو تاکە ڕزگاربو لەگەڵ ڕێکخراوەکانی بواری ئەنفال و جینۆساید ئەوەیە کە هاوکارمان بن لە بە نێودەوڵەتیکردنی ئەم کەیسە کە هیچی کەمتر نییە لە تراژیدیا گەورەکانی دیکەی جیهان، بۆیە هاوارمان هاواری بە جینۆساید ناساندنی ئەم کەیسەیە لە ئاستێکی گەورەی جیهانیدا.

 

چوارەم؛ حکومەتی عێراق قەرەبوی کەسوکاری سەربەرزی ئەنفال و شەهیدان بکاتەوە ( بە پێی یاسای ١٣٢ ی دادگای باڵای تاوانەکانی عێراق).

 

پێنجەم؛ سەرجەم ئەو جاش و مستەشارانە دەستگیر بکرێن کە داواکراون لە لایەن دادگای باڵای تاوانەکانی عێراق ‌و دەستیان هەبوە لە تاوانی ئەنفالدا.

 

شەشەم ؛ مووچەی کەسوکاری سەربەرزی شەهیدان و ئەنفال کراوان هاوتای مووچەی شەهیدانی عێراق بکرێت.

 

حەوتەم؛ دەبێت پشکنینی دی ئێن ئەی بۆ ئەو ڕوفاتانە ئەنجام بدرێت کە ساڵی ڕابردوو لەگۆڕە بەکۆمەڵەکانی پارێزگای سەماوە هەڵدرایەوە.

 

لە درێژەی نامەکەیدا ئەو تاقانایەی ئەنفال ئاماژەی بەوەشکردووە: "هەموو ئەمانە لە کاتێکدان کە پشکنینی دی ئێن ئەی -DNA بۆ ڕووفات و ئەو گۆڕانە نەکراون کە هەڵدراونەتەوە بەبێ ئامادەبونی ئێمە، ئێستاش بە نیازن بەو شێوە نەگونجاوە بەبێ ڕەزامەندی ئێمەو بە هەڕەشەکردن لێم و بێدەنگ کردنمان مەراسیمی هێنانەوەی ڕووفاتەکان بە ئەنجام بگەیەنن".

 

لە کۆتایی نامەکەیدا تەیموری ئەنفال ئەوەی خستووەتەڕوو: " داواتان لێدەکەم و هانای مرۆڤایەتیم بۆ هێناون ڕێگە لەم پرۆسە نا دروستە بگرن، ئاگایی ئەوەشتان دەدەمێ کە هەموو کاتێک ژیانی بەندە لە ژێر مەترسی و پیلانگێڕیدا بوەو هەوڵی دروستکردنی چەندین کەیسیان لە دژ داوم".