گه‌ڕان

Shadow Shadow
سیاسه‌تی

لێكۆڵينەوەيەك جيهان بێهيوا دەكات.. گەرما كاريگەرى لەسەر كۆرۆنا نييە

2020.05.09 - 23:14
لێكۆڵينەوەيەك جيهان بێهيوا دەكات.. گەرما كاريگەرى لەسەر كۆرۆنا نييە

ناس کورد-

 

بەپێى لێكۆڵينەوەيەكى نوێ كە لەسەر 144 دەوڵەتى جيهان كراوە، جیهان بەرەو بێهیوایی دەبات و دەرکەوتووە بەرزبونەوەى پەلەكانى گەرما  كاريگەرى لەسەر بڵاوبونەوەى ڤايرۆسى كۆرۆنا نييە.

 

بەپێى لێكۆڵينەوەكە كە زانكۆى "تۆرينتۆ"ى كەنەدا ئەنجاميداوەو گۆڤارى كۆمەڵەى پزيشكى كەنەدى بڵاويكردوەتەوە، هيچ پەيوەندیيەك لەنێوان گەشەكردنى پەتاى كۆرۆنا و پلەى گەرمى و ڕادەى شێ نەدۆزراوەتەوە، ئەوەش بە پشت بەستن بە داتاى 144 دەوڵەتى جيهان.



لێكۆڵينەوەكە دەڵێت، پەيوەندیيەكى بەهێز لەنێوان داخستن و قەدەغەى هاتوچۆ و ڕێوشوێنەكان و دوركەوتنەوەى كۆمەڵايەتى و بڵاوبونەوەى ڤايرۆسەكەوە هەيە كە زۆرينەى دەوڵەتانى جيهان پەيڕەويان كردوە.



شارەزايان باسيان لەوەكردوە، ئەو رێوشوێن و كۆت و بەندانەى دەسەڵاتدارانى جيهان گرتويانەتەبەر كاراترين ئامڕازە بۆ بەرەنگاربونەوەى پەتاى كۆرۆناى نوێ COVID-19.



لاى خۆشيەوە "ديون جيسينك" زاناى پەتاكان لە زانكۆى تۆرينۆ و نوسەرى لێكۆڵينەوەكە وتويەتى، هاوين نابێتە هۆى ديارنەمانى پەتاى كۆرۆنا و گرنگە خەڵك ئەوە بزانێت.

 

ئەم ئەنجامە كە جێى نيگەرانى و بێهيوايى جيهانە، دواى ئەوەدێت، زۆرينەى خەڵكى جيهان چاوەڕێى وەرزى گەرمايان دەكرد بەهيواى ئەوەى پەتاى كۆرۆنا ديار نەمێنێت، هەروەك ڤايرۆسى ئەنفلۆنزاى وەرزى تا بتوانن بگەڕێنەوە ژيانى ئاسايى و سەركارەكانيان.



سەرەڕاى ئەوەى كەشوهەواى جيهان لە نيوەى باكورى گۆى زەوى بەرەو گەرمبون دەچێت، بەڵام بەپێى داتاكان بڵاوبونەوەى ڤايرۆسى كۆرۆنا ڕووى لە كەمبونەوە نەكردوە و پەتاكە بەردەوامە لەبڵاوبونەوە، بەپێى دواين ئامار تائێستا زياتر لە 4 مليۆن و 77 هەزار كەس لە جيهاندا توشبون و زياتر لە 279 هەزار كەس گيانيان لەدەستداوە و نزيكەى يەك مليۆن و 418 هەزار كەسيش چاكبونەتەوە.

 

پشكى شێرى توشبوان و قوربانيان بەر ئەمريكا دەكەوێت و دواى ئەوەش وڵاتانى ئەوروپا بەتايبەتى ئيسپانيا، ئيتاڵيا، بەريتانيا، ڕوسيا، فەرەنسا و ئەڵمانيا.