گه‌ڕان

Shadow Shadow
سیاسه‌تی

ئەوقافی سلێمانی: هەر مامۆستایەکی ئایینی سبەینێ نوێژی هەینی ئەنجامبدات سزا دەدرێت

2020.05.07 - 22:41
ئەوقافی سلێمانی: هەر مامۆستایەکی ئایینی سبەینێ نوێژی هەینی ئەنجامبدات سزا دەدرێت

 

ناس کورد- ڕۆژیار سیروان

 

بەڕێوەبەری ئەوقافی سلێمانی ڕایگەیاند، نابێت سبەینێ لە هیچ مزگەوتێکی پارێزگای سلێمانیدا نوێژی هەینی ئەنجاممبدرێت و مامۆستایانی ئایینیش یاگادار دەکاتەوە، ئەگەر نوێژی هەینی ئەنجامبدەن ڕووبەڕووی سزای یاسایی دەکرێنەوە.

 

 

فەرەیدوون غەریب، بەرێوەبەری ئەوقافی سلێمانی بە ناس کوردی ڕاگەیاند: " نابێت سبەینێ لە هیچ مزگەوتێکدا وتار و نوێژی  هەینی ئەنجام بدرێت و  هەر مامۆستایەک نوێژی هەینی ئەنجام بدات رووبەرووی سزای یاسایی دەبێتەوە".

 

بەڕێوەبەری ئەوقافی سلێمانی وتیشی، پێویستە مامۆستایانی ئایینی و هاووڵاتیان خۆراگر بن تاوەکو 11ی مانگ بڕیاری کۆتایی لەوبارەیەوە دەدرێت.

 

ئەمە لەکاتێکدایە، ئەمڕۆ زۆرینەی مزگەوتەکانی شاری سلێمانی دەرمانڕێژڕێژ کران و عەبدوڵا ئەحمەد، جێگری بەڕێوەبەری تەندروستیی سلێمانی بۆ کاروباری کارگێڕی بە ناس کوردی ڕاگەیاند: "وەک تەندروستیی سلێمانی ڕەزامەنین بە کردنەوەی دەرگای مزگەوتەکان لە ئەمڕۆوە و کۆتا بڕیاریش لای وەزارەتی ئەوقافە".

 

هاوکات هەر ئەمشەو، لە ڕاگەیەندراوێکدا وەزارەتی ئەوقاف و کاروباری ئایینی ڕایگەیاند: " رۆژی یەک شەممەی داھاتوو بەپێی رێنمای و ئەگەری هەڵومەرجی گونجاوی تەندروستی لێژنەی باڵای کرۆنا بریار لەسەر کردنەوەی دەرگای مزگەوتەکان دەدات".

 

ئاماژەی بەوەشکرد: "ئەم رێکارانەی کەلەمەودوا پەیرەو دەکرێ  لەپێناوی ئەوەیە کە ھەموولایەک ئەرک و بەرپرسیاریەتی ئایینی نیشتیمانی لەئەستۆبگرین بۆ پاراستنی تەندروستی ھاوڵاتیانی ئازیزمان".