گه‌ڕان

Shadow Shadow
سیاسه‌تی

ناوەرۆکى کۆبوونەوەیەکى کازمى و چەند پەرلەمانتارێک لەبارەى کورد و موچەى فەرمانبەرانەوە

2020.05.05 - 11:18
ناوەرۆکى کۆبوونەوەیەکى کازمى و چەند پەرلەمانتارێک لەبارەى کورد و موچەى فەرمانبەرانەوە

ناس کورد-

پەرلەمانتارێکى کورد لە پەرلەمانى عێراق ڕایگەیاند، مستەفا کازمى پێی ڕاگەیاندوون کە دەیەوێت کێشەکانى هەرێم و بەغدا بەپێی دەستور چارەسەر بکرێن و ڕێز لە رێککەوتنەکانى پێشوو دەگرێت لەو بارەیەوە.

 

موسەننا ئەمین پەرلەمانتارى فراکسیۆنى یەکگرتوو لە پەرلەمانى عێراق لە ڕاگەیەنراوێکدا ڕایگەیاند، شەوى ڕابردوو لە بەغداد لەگەڵ چەند پەرلەمانتارێک چاویان کەوت بە مستەفا کازمى راسپێردراو بۆ پێکهێنانی حکومەت و باسى چەند پرسێکیان کردووە، لەناویاندا ماف و شایستە داراییەکانی هەریم و موچە و بودجە.

 

وتیشى "کازمى هاوکار و هاورا دیاربوو پێی وتین بەرنامەی حکومەتم باشتر کردوە و باسی هەرێمم تێدا داناوە کاتی خۆی هەبوو بەڵام زۆر کورتکرایەوە، جەختیشیکردەوە کە نەتەوەیی و شۆڤێنى نییە".

 

موسەننا ئەمین دەڵێت "کازمى باسى لەوە کردووە کە شیعەیە بەڵام مەزهەبی نییە، چونکە ستەمی مەزهەبی قەیرانی گەورەی دروستکردووە، سات بە ساتی ئەنفالی کورد لەگەڵى بووم".

 

"بە تەما نیم زوڵم لەکەس بکەم کێشەکان دەبێت بە پێی دەستور چارەسەر بن، رێز لە ماف و رێکەوتنەکانی پێشوو دەگرم" بەوتەى موسەننا ئەمین، کازمى بەو شێوەیە باسى لە کێشەکانى پەیوەست بە شایستە داراییەکانى هەرێم و موچەى فەرمانبەران لەگەڵ هەرێم کردووە.

 

هەروەها کازمى بە پەرلەمانتارەکانى وتووە "کێشەکانی عێراق ئەوەندە زۆرن سەرەخۆشیم دەوێت نەک پیرۆزبایی، هاوکارم بن با پێکەوە خزمەت بەم باسانە بکەین و دەرگام هەمیشە لەسەر پشت دەبێت بۆتان".

 

موسەننا ئەمین دەڵێت "باوەڕی خۆم وایە کە کێشەکانی عێراق نوێیەکان و کۆنە کەڵەکەبووەکان لە توانای هەرکەس گەورەترن، هەرچەندە باشی کەسەکان گرنگە بۆ کارەکە، بەڵام ئەو ژینگە سیاسیە کاری تێدا دەکات هەندێ ناچاری خۆی هەیە، حکومەت خراپیش بێت لە بێ حکومەتی باشترە".

 

لەکۆتایدا ئەو پەرلەمانتارە باسى لەوەکردووە کە بەنیازە دەنگ بە کابینەکەى کازمى بدات، لەکۆبوونەوەى پەرلەماندا کە بڕیارە سبەینێ چوارشەممە بەرێوەبچێت.