گه‌ڕان

Shadow Shadow
سیاسه‌تی

فراکسیۆنى پارتی: دەبێت سۆران عومەر لەسەر داوای بەڕێز سەرۆک وەزیران بچێتە بەردەم دادگا

2020.05.04 - 23:23
فراکسیۆنى پارتی: دەبێت سۆران عومەر لەسەر داوای بەڕێز سەرۆک وەزیران بچێتە بەردەم دادگا

ناس کورد-

فراکسیۆنى پارتی لە پەرلەمانی کوردستان ڕایگەیاند، پرسی لابردنی پارێزبەندی لەسەر پەرلەمانتار "هیچ قابیلی هاتوهاوارو شپرزە بوون نییە، بە دیاریکراوی پەرلەمانتاری کۆمەڵی ئیسلامی سۆران عومەر لەسەر داوای بەڕێز سەرۆک وەزیران کاک مەسرور بارزانی دەبێت بچێتە بەردەم دادگا." 

 

ئەمڕۆ دووشەممە، 4ی ئایاری 2020، فراکسیۆنەکە لە ڕاگەیەنراوێکدا دەڵێت، "ئەوەی بەڕێز سەرۆکی حکومەت دەیکات چەسپاندنی یاسایە و ڕێگایەکی شارستانیانەیە، کە ئەگەر بژمێردرێت لەوانەیە سەدهەمینجار بێت ئەو پەرلەمانتارە تەشهیرو ناوزڕاندن پیشەی بووە و زۆربەی جار چاوپۆشی لێکراوەو پێشتر داوایەکی هەر لە دادگا بەرانبەر بەڕێز سەرۆک وەزیران دۆڕاندووە و 110 ملیۆن دینار دەبوو قەرەبوو بدات بەڵام تەنها دووسەدو پەنجا دیناری لێوەرگیرا."

 

دەشڵێت، "ئەوانەی ئاین بەکار دەهێنن بۆ سیاسەت و بوختان و تەشهیر کارو پیشەیانە خۆ دەبێت جارێک کەسێک پێیان بڵێت ئەم ڕیاکارییە ڕابگرە، نیگەرانبوون بە چوونە بەردەم یاسا دوو ڕووییە لە بەرانبەر ئاین و دووفاقییە لە داواکردنی دادگەریی."

 

ئاماژەى بەوەشکردووە، "خەڵک دەبێت بزانن ئەم نموونانە چەندین ساڵە بوختان دەکەن و گوێی خەڵکییان پڕکردووە لە قسەی ناڕاست ئێستاش پەلەقاژێ و ترس لە دادگا نیشانەی پرسیارە، چوونکە مرۆڤ گەر ڕاستگۆ بێت باکی چییە بەوەی بچێتە بەردەم دادگا، بەڕێز سەرۆک وەزیران شارستانیانەترین رێگای گرتۆتە بەر وەک هەر هاوڵاتییەکی ئەم هەرێمە کە مافی خۆیەتی ڕێگری بکات لە بوختان و ناوزڕاندن بەرانبەری."

 

"هەموو پەرلەمانتارێک ئەرکی ئەوەیە لەخزمەت خەڵکی کوردستاندا ڕۆڵی خێرو چاکە بگێڕێت و لەو ناڕەحەتییانەی کە دێنە پێش بۆ میللەتەکەمان پاڵپشتی خەڵک بن نەک خەریکی پرتەو بۆڵەی لابەلاو بوختان و ئاژەوەگێڕی" فراکسیۆنی پارتی وا دەڵێت.