گه‌ڕان

Shadow Shadow
سیاسه‌تی

دەبێت ئەم هەفتەیە ڕێکبکەون

پەرلەمانتارێکی پارتی: سبەینێ شاندەکەى هەرێم بۆ ‘ڕێککەوتن‘ دەچێتەوە بەغدا

2020.05.02 - 16:53
پەرلەمانتارێکی پارتی: سبەینێ شاندەکەى هەرێم بۆ ‘ڕێککەوتن‘ دەچێتەوە بەغدا

ناس کورد-

بڕیارە سبەینێ شاندێکی حکومەتی هەرێم بچێتەوە بەغدا و پەرلەمانتارێکی پارتیش لە بەغدا دەڵێت، ئەمجارە شاندەکە بۆ ڕێککەوتن دەچن و پێش پێکهێنانی کابینەکەی کازمی لەم هەفتەیەدا دەبێت ڕێککەوتنێک بکرێت.

 

مەیادە محەمەد، ئەندامی فراکسیۆنی پارتی لە پەرلەمانی عێراق بە ناس کوردی ڕاگەیاند: "سبەینێ شاندێکی حکومەتی هەرێم دەچێتەوە بۆ بەغدا بۆ درێژەدان بەو گفتوگۆیانەی لە هەفتەی ڕابردوودا کران و ڕێککەوتن لەسەر ئەو بابەتانەی گفتوگۆیان لەسەر کراوە".

 

وتیشی، تائێستا ڕوون نییە هەر ئەو شاندە دەچنەوە، یاخود شاندێکی دیکە و لە ئاستی باڵاتر دەچن، بەڵام هەر شاندێک بێت ئەمجارە بۆ ڕێککەوتن دەچن، پێش ئەوەی کابینەکەی مستەفا کازمی پێکبێنرێت.

 

ئەو پەرلەمانتارە ئاماژەی بەوەشكرد، بڕیارە لەم هەفتەیەدا دەنگ بە کابینەکەی کازمی بدرێت و دەبێت پێش ئەو وادەیە ڕێککەوتن لەسەر کێشەکانی هەرێم و بەغدا ئەنجامبدرێت، بۆ ئەوەی لە چوارچێوەی ئەو ڕێککەوتنەدا بریاربدەن دەنگ بە کابینەکەی کازمی بدەن، یاخود نا.

 

ڕوونیشیکردەوە، لەم پرسەدا سەرجەم فراکسیۆنە کوردییەکان یەکدەنگن و هەر بریارێک بدرێت، بە دەنگدان یاخود ڕەتکردنەوەی کابینەکەی کازمی، ئەوا پێکەوە و بە کۆی دەنگ بڕیار دەدەن.

 

ئەمە لەکاتێکدایە، دوای ئەوەی هەفتەی ڕابردوو، شاندێکی حکومەتی هەرێم بە سەرۆکایەتی قوباد تاڵەبانی چونە بەغدا، بۆ گفتوگۆکردن لەسەر کێشە هەڵپەسێردراوەکانی نێوان هەرێم و بەغدا و بەتایبەت لەسەر موچە، بەبێ هیچ ڕێککەوتنێک ئێوارەی دوێنێ گەڕانەوە هەولێر.

 

لەلایەکی ترەوە، بڕیاردەرى لیژنەى دارایی پەرلەمانى عێراق ڕایگەیاند، حکومەتى عێراق داواى زانیارى کردووە لە هەرێم لەبارەى فەرمانبەران و نەوت و بودجەوە.

 

بڕیارە سبەینێ شاندى هەرێمى کوردستان بگەڕێتەوە بەغدا بۆ ئەنجامدانى دانوستان لەگەڵ بەغدا لەبارەى موچەى فەرمانبەران، دواى ئەوەى کۆبوونەوەکانى هەفتەى ڕابردوو لەو بارەیەوە بێ ئەنجام بوون.

 

ئەحمەد سەفار، بڕیاردەرى لیژنەى دارایی پەرلەمانى عێراق بە ناس کوردى ڕاگەیاند، "سبەینێ شاندەکە دەگەڕێنەوە بەغدا بۆ تەواوکردنى دانوستانەکان لەو بارەیەوە".

 

وتیشى، "حکومەتى عێراق داواى زانیارى کردووە لەبارەى فەرمانبەرانى هەرێم و بودجە و نەوت".

 

ئەحمەد سەفار باسى لەوەشکرد، بەهۆى خراپى دۆخى دارایی عێراقەوە ناتوانن پێشبینى گەیشتن بە رێککەوتن بکەن، لەگەڵ ئەوەشدا حکومەتى ئێستا کاربەڕێکەرە و ناتوانێت بڕیار لەسەر هەموو شتێک بدات.

 

جەختیشیکردەوە، هەر رێککەوتنێک لەو بارەیەوە پێویستە لەگەڵ کابینەکەى کازمى بکرێت و پاشان لە پەرلەمانیش پەسەند بکرێت، بۆ ئەوەى کێشەکان دوبارە نەبێتەوە.