گه‌ڕان

Shadow Shadow
سیاسه‌تی

منداڵانى توشبووى كۆرۆنا زانايانيان توشى سەرسوڕمان كردوە.. نايگوازنەوە بۆ كەسانى تر

2020.04.30 - 23:05
منداڵانى توشبووى كۆرۆنا زانايانيان توشى سەرسوڕمان كردوە.. نايگوازنەوە بۆ كەسانى تر

ناس کورد- 

 

بەپێى لێكۆڵينەوەيەكى نوێ ئەو منداڵانەى توشى ڤايرۆسى كۆرۆناى نوێ COVID-19 بوون ڤايرۆسەكە ناگوازنەوە بۆ كەسانى تر، سەرەڕاى ئەوەى لەگەڵ كەسانى تريشدا تێكەڵاو بوون و دەژين.

 

بەپێى لێكۆڵينەوەیەک كە لەلايەن ليژنەى هاوبەشى چين و ڕێكخراوى تەندروستى جيهانى ئەنجام دراوە و ڕۆژنامەى "دەيلى مەيڵ"ى بەريتانى بڵاويكردوەتەوە، تائێستا هيچ حاڵەتێكى گواستنەوەى ڤايرۆسى كۆرۆنا لە منداڵانى توشبوەوە بۆ كەسانى تر تۆمار نەكراوە.

 

ئەوەش هاتوە، لە لێكۆڵينەوەكەدا هيچ حاڵەتێك تۆمار نەكراوە لەسەر ئەوەى منداڵانى خوار تەمەن 10 و توشبوى كۆرۆنا ڤايرۆسەكەيان بۆ كەسانى تر گواستبێتەوە، ئەوەش سەرەڕاى ئەوەى لەگەڵ گەورەكاندا تێكەڵ بون و تەنانەت ماچى يەكتريان كردوە لەگەڵ ئەندامانى ترى خێزانەكانيان.

 

ئەوەش ڕونكراوەتەوە، منداڵان و گەنجان كاريگەريان نييە لە گواستنەوەى پەتاكە بۆ كەسانى تر، سەرەڕاى ئەوەى زانايان دانيان بەو ڕاستيەدا ناوە، بەڵام هۆكارەكەى ڕوون نييە.

 

پرۆفيسۆر "ڕاسڵ فينەر" لە كۆلێژى پاشايەتى بۆ پزيشكى منداڵان و تەندروستى منداڵان بە ڕۆژنامەى "تەلەگرافى" بەرتيانى وتوە، لە سەرتاسەرى جيهاندا هيچ بەڵگەيەك بۆ ئەوە نييە كە منداڵان ڤايرۆسەكەيان بۆ كەسى تر گواستبێتەوە و هيچ بەڵگەيەكى تەواو لەبەردەستدا نييە.

 

لەلايەكى ترەوە بەپێى پێداچونەوەى تۆمارى پزيشكى منداڵان تايبەت بە ڤايرۆسى كۆرۆنا كە لەلايەن دكتۆر "ئالاسدير مۆنرۆ" لە بەريتانيا ئەنجام دراوە، بەڵگەكانى ئێستادا ئەوە ڕوندەكەنەوە كە پەتاكە لەنێو منداڵاندا بەردەوامە لە كەمبونەوەو دابەزين.

 

يەكێك لە نمونەكان منداڵێكى بەريتانيە كە تەمەنى نۆ ساڵە، لە فەرەنسا توشى ڤايرۆسى كۆرۆنا بوە، بەڵام سەرەڕاى ئەوەى لەگەڵ زياتر لە 170 كەسدا تێكەڵاو بووە ڤايرۆسەكەى بۆ هيچ كەسێك نەگواستوەتەوە.

 

منداڵەكە لەكاتى بەشداريكردن لە خليسكێنەى سەر بەفر لە شاخى "ئەلب" لە فەرەنسا توشبوە، چوەتە سێ خوێندنگەى خليسكێنەى سەر بەفر لە ڕۆژهەڵاتى فەرەنسا، ئەوەش لەكاتێكدا هەڵگرى ڤايرۆسەكە بوە و تێكەڵاوى دەيان كەس بووە، بەڵام هيچ يەكێك لەوانە توشى ڤايرۆسەكە نەبون.