گه‌ڕان

Shadow Shadow
سیاسه‌تی

پێشنیازی زیادکردنی كورسی كۆتاكان کراوە بۆ ئەنجومەنی پارێزگاکان

2019.04.10 - 17:12
پێشنیازی زیادکردنی كورسی كۆتاكان کراوە بۆ ئەنجومەنی پارێزگاکان

ناس كورد – فوئاد عەبدوڵا

 

ئەندامێکى لیژنەى یاسایی پەرلەمانی عێراق رایگەیاند، هیچ گۆڕانکارییەک لە ژمارەی کورسی ئەنجومەنى پارێزگاکاندا ناکرێت بەڵام پێشنیازی زیادکردنی کورسی کراوە بۆ کۆتاکان و ئەوەش بە دەنگدانی ناو پەرلەمان یەکلایی دەکرێتەوە.

بەهار مەحمود، ئەندامی لیژنەى یاسایی پەرلەمانی عێراق لە فراکسیۆنى گۆڕان بە ناس کورد-ی ڕاگەیاند، دوای ئەوەى خوێندنەوەى یەكەم بۆ هەمواری پڕۆژە یاسای هەڵبژاردنەکانى ئەنجومەنى پارێزگاکان کرا، كۆمەڵێك تێبینی و پێشنیاز خراونەتەڕوو، لەئێستادا لیژنەى یاسایی سەرقاڵی ڕێکخستنەوە و ئامادەکردنێتی بۆ خوێندنەوەى دووەم.

بەهار مەحمود وتیشى، بەمزوانە خۆێندنەوەی دووەم بۆ یاساكە دەكرێت جا ئەگەر هەڵبژاردنی ئەنجومەنى پارێزگاکان لە 15ی تشرینی دووەمی ئەمساڵدا بکرێت یاخود بخرێتە ساڵی 2020.

لەبارەى ئەنجامدانی هەڵبژاردن لە پارێزگای کەرکوک، بەهار مەحمود وتی، "لە گفتوگۆکانى لیژنەى یاساییدا دوو بۆچوون هەبوون، بەشێک دژى ئەنجامدانی هەڵبژاردن بووە لە کەرکوک بە بیانوی نالەباری دۆخەکە، بەشێکی دیکە لەگەڵ ئەنجامدانیدا بوون و پێیان وابوو نابێت چیتر هەڵبژاردنی ئەو پارێزگایە دوابخرێت. "

كۆمسێونی باڵای هەڵبژاردنەكانی عێراق هەمواری پڕۆژە یاسای هەڵبژاردنی ئەنجوومەنی پارێزگاکانی عێراقی ژمارە 12ی ساڵی 2018 داوەتە پەرلەمانی عێراق بۆ پەسەندکردنی.