گه‌ڕان

Shadow Shadow
سیاسه‌تی

ئاکەپە نایەوێت کۆڵ لە ئەستەنبوڵ بدات

2019.04.09 - 16:24
ئاکەپە نایەوێت کۆڵ لە ئەستەنبوڵ بدات

ناس کورد-سۆران ڕەشید

لە مێژووی سیاسی تورکیای نوێدا دەوترێت، ئەوەى ئەستەنبوڵ ببات هەموو تورکیای بردووەتەوە، ئەردۆغانیش یەکێکە لە نمونەکان کاتێک لە هەڵبژاردنی شارەوانییەکانى 1994دا و لەدوای بەدەستهێنانی 25%ی دەنگەکان، بە سەرۆکى شارەوانی ئەستەنبوڵ هەڵبژێردرا کە بە پایتەختی ئابوری و گەشتیاری تورکیا ناسراوە.

لە هەڵبژاردنەکانى 31ی ئازاری 2019دا بۆ شارەوانیەکانى تورکیا، لەپاڵ ئازاری لەدەستدانی ئەنقەرەى پایتەخت و گەورەشاری ئەزمیر لەلایەن پارتی داد و گەشەپێدانەوە (ئاکەپە)، ئازاری لەدەستدانی ئەستەنبوڵیش هاتەسەر کە 25 ساڵ لەدەستیدا بوو.

 

 

 

 

 

 

 

 

 

 

 

 

 

 

بەپێی ئەنجامی جیاکردنەوەى دەنگەکانی شارەوانی ئەستەنبوڵ لە هەڵبژاردنەکەى 31ی ئازاردا، ئەکرەم ئیمامئۆغڵۆ، کاندیدی پارتی گەلی کۆماری ئۆپۆزسیۆن (جەهەپە) بە جیاوازی 25 هەزار دەنگ لە بن عەلی یەڵدرم، ڕکابەری سەرەکی و کاندیدی ئاکەپەی بردەوە.

هەر هەمان شەوی هەڵبژاردنەکان بەرپرسانى ئاکەپە داوای هەژمارکردنەوەى دەنگی 31ی بازنەى هەڵبژاردنیان کرد، بەڵام کۆمسیۆن داواکەى ڕەتیکردەوە و هەژمارکردنەوە بۆ تەنها 51 سندوقی دەنگدان ئەنجامدرا، لەدوای ئەوەش، کاندیدەکەى ئۆپۆزسیۆن هەر پێشەوە ئەگەرچی جیاوازی دەنگەکان کەمبووەوە بۆ 15 هەزار.

لەدوای ئەوە، کاندیدى براوەی ئۆپۆزسیۆن رایگەیاند، کاتی ئەوە هاتووە حزبەکەى ئەردۆغان دۆڕانی خۆی لە ئەستەنبوڵ ڕابگەیەنێت، ئەردۆغانیش پڕۆسەى هەڵبژاردنی لە ئەستەنبوڵ بە "تاوانێکى ڕێکخراو" ناوبرد.

شارەوانی ئەستەنبوڵ لە 39 بازنەى هەڵبژاردن پێکهاتووە و ژمارەی دانیشتوانیشی نزیکەى 15 ملیۆن کەسە.

 

 

 

 

 

 

 

 

 

 

 

 

لەدوای شکستی هەنگاوی یەکەم، ئاکەپە دەیەوێت گولـلەى کۆتایی بتەقێنێت و داوای دووبارەکردنەوەى هەڵبژاردنی کرد لە شارەوانی ئەستەنبوڵ.

عەلی ئیحسان یاڤوز، جێگری سەرۆکی گشتیی ئاکەپە رایگەیاند، رێگای تانەی نائاسایی بەكاردەهێنن و داوای دووبارەكردنەوەی هەڵبژاردن دەكەن لە ئەستەنبوڵ.

هاوکات ده‌وڵه‌ت باخچەلی، سەرۆکى گشتیی مەهەپە کە هاوپەیمانی سەرەکی ئاکەپەیە رایگەیاند، "ده‌كرێت بیر له‌ هه‌ڵبژاردنێكی نوێ بكرێته‌وه‌ كه‌ ویژدان ئاسووده‌ بكات".

لە بەرامبەردا، کەمال کڵچدارئۆغڵو، سەرۆکی جەهەپە کە ئۆپۆزسیۆنى ئاکەپەیە دەڵێت، کۆمسیۆنی هەڵبژاردنەکان لاوازە لە پاراستنى سندوقەکانی دەنگداندا بەجۆرێک مەترسی کەوتووەتە سەر پاراستنی ئاسایشی سندوقەکان.

رۆژی 31ـی ئازاری 2019، لە 81 پارێزگای تورکیا هەڵبژاردنی شارەوانیەکان ئەنجامدرا و 57 ملیۆن کەس مافی دەنگدانیان هەبوو.