گه‌ڕان

Shadow Shadow
سیاسه‌تی

بۆچی سێ لایەنە ئیسلامییەکەی هەرێم بەدوای یەکدا سەردانی بەغدایان کرد؟

2019.04.09 - 14:20
بۆچی سێ لایەنە ئیسلامییەکەی هەرێم بەدوای یەکدا سەردانی بەغدایان کرد؟

ناس کورد-سۆران ڕەشید

لە ماوەى ١٤ رۆژی ڕابردوودا (24ی ئازار بۆ 7ی نیسانی 2019)، هەر سێ لایەنی ئیسلامی هەرێم (کۆمەڵی ئیسلامی، یەکگرتووی ئیسلامی و بزوتنەوەى ئیسلامی) بە جیا و بەدوای یەکدا سەردانی بەغدایان کردووە.

سەردانی لایەنە ئیسلامییەکانى کوردستان بۆ بەغدا شتێکى نامۆ نییە، بەڵام یەک لە دوای یەکی سەردانەکان لە ماوەیەکى دیاریکراوی 14 رۆژیدا شتێکى ئاسایی نییە بە تایبەت شاندەکان لەسەر یەک ئاست و بە سەرۆکایەتى کەسی یەکەمی ئەو حزبانە بوون.

لەو سەردانانەدا، شاندەکان بەجیا لەگەڵ هەر سێ سەرۆکایەتییەکە و بەشێکى زۆری لایەنە سیاسییە سەرەکییەکانى بەغدا و چەند کەساییەتییەکدا کۆبوونەوەتەوە.

  - رۆژی 24ی ئازاری 2019، شاندەکەى بزوتنەوەى ئیسلامی بە سەرۆکایەتى عیرفان عەبدولعەزیز ڕابەری گشتیی گەیشتە بەغدای کرد و سێ ڕۆژ لە بەغدا مایەوە.

  - ڕۆژی 3ی نیسانی 2019، شاندەکەى کۆمەڵی ئیسلامی بە سەرۆکایەتى عەلی باپیر ئەمیری ئەو حزبە گەیشتە بەغدا و دوو ڕۆژ لە بەغدا سەرقاڵی کۆبوونەوە بوون.

  - ڕۆژی 7ی نیسانی 2019، شاندەکەى یەکگرتووی ئیسلامی بە سەرۆکایەتى سەڵاحەدین بەهادین ئەمینداری گشتی گەیشتە بەغدا و ژمارەیەک دیدار و کۆبوونەوەیان لەگەڵ بەرپرسانى عێراق ئەنجامدا.

 

بزوتنەوەى ئیسلامی: ئێمە یەکەمجار سەردانمان کردووە

عەبدوڵا وەرتی، وتەبێژی بزوتنەوەى ئیسلامی و ئەندامێکى شاندی حزبەکەى بۆ بەغدا بە ناس کورد-ی راگەیاند، سەردانەکەیان لەسەر بانگهێشتى سەرۆک کۆمار بووە و بۆ داڕشتنەوەى پەیوەندییە دیبلۆماسییەکانی خۆیان سەردانەکەیان ئەنجام داوە و ئەوەش یەکەم سەردانی فەرمیی حزبەکەیانە لەدوای ساڵی ٢٠٠٣وە.

لەبارەى بوونی هەماهەنگی لەنێوان سەردانی ئەو سێ لایەنە ئیسلامییەدا، عەبدوڵا وەرتی ڕەتیکردەوە هیچ هەماهەنگییەکى پێشوەختە لەگەڵ دوو لایەنە ئیسلامییەکەى دیکە هەبووبێت سەبارەت بە سەردانەکەیان و دەڵێت، بزوتنەوەى ئیسلامی یەکەمجار سەردانی بەغدای کردووە و دەکرێت پرسیار لە دوو لایەنەکەى دیکە بکرێت بۆچی دواتر و بەدوای یەکدا سەردانی بەغدایان کردووە.

 

 

 

 

 

 

 

 

 

 

 

 

 

 

 

 

کۆمەڵی ئیسلامی: ئاگاداری سەردانی یەکتر نەبووین

هاوکات سەلیم کۆیی، ئەندامی ئەنجومەنى سەرکردایەتى کۆمەڵ و ئەندامێکى شاندی حزبەکەى بە ناس کورد-ی ڕاگەیاند، لەسەر داوای خۆیان و بەبێ بانگهێشتى هیچ لایەنێک سەردانی بەغدایان کردووە چونکە ئێستا باشترین کاتە و کەشوهەوای سیاسی و پەیوەندییەکانی هەولێر و بەغدا زۆر ئارامە.

سەلیم کۆیی وتیشى، هیچ پەیوەندییەک لە نێوان سەردانەکاندا نەبووە و "ئاگاداری سەردانی یەکتریش نەبووین"، دیارە دوو لایەنەکەى دیکەش ئەم کاتەیان بە باش زانیوە بەڵام هیچ هەماهەنگییەکان لەنێوان سەردانەکانماندا نەبووە.

 

 

 

 

 

 

 

 

 

 

 

 

 

 

 

یەکگرتوو: لەپێش هەڵبژاردنەوە بڕیاربوو سەردانی بەغدا بکەین

محەمەد هاودیانی، ئەندامی ئەنجومەنى سەرکردایەتى و ئەندامێکى شاندەکەى یەکگرتوو بە ناس کورد-ی ڕاگەیاند، ئامانجی سەردانەکەیان بنیادنانەوەى پەیوەندییەکانیان لەگەڵ لایەنەکان بۆئەوەى جارێکى دیکە پشکی و پارەی هاوڵاتیانى هەرێم دور بێت لە سزای سیاسی و نەبڕدرێت.

وتیشى، لە پێش هەڵبژاردنەکانى پەرلەمانی عێراق بڕیاریان داوە سەردانی بەغدا بکەن بەڵام دەرفەت نەبوو و ڕەتیکردەوە هیچ هەماهەنگییەکی پێشوەختەیان لەگەڵ لایەنە ئیسلامییەکان کردبێت و ئاگاداری سەردانی یەکتریش نەبوون.

لە ڕاگەیەندراوی فەرمیی کۆبوونەوە و گفتوگۆکانى سەردانی ئەو سێ لایەنە ئیسلامییەدا هاتووە، سەردانەکانیان سەرکەوتوو بووە و چەندین تەوەری وەک پەیوەندییەکانى هەولێر و بەغدا و پشکی کورد لە بودجە و کۆتایی هاتنی کێشەکانى هەردوولا و رەوشی عێراق و ناوچەكە و دواین روودا و پەرەسەندنەكانیان تاوتوێکردووە.