گه‌ڕان

Shadow Shadow
چیرۆكه‌كانمان

لە چرکەیەکدا 900 مەتر سێ جا ئاو دێتە ناو بەنداوەکەوە

بەنداوی دەربەندیخان پێویستی بە 30 ملیۆن دۆلارە بۆ گەڕانەوەی بۆ دۆخی پێشوی

2019.04.08 - 23:02
بەنداوی دەربەندیخان پێویستی بە 30 ملیۆن دۆلارە بۆ گەڕانەوەی بۆ دۆخی پێشوی

 

ناس كورد- هەڤاڵ فەتاح

لیژنەیەكی پەرلەمانی سەردانی بەنداوی دەربەندیخانی كردووە بۆ زانینی دۆخی بەنداوەكە، بەڕێوەبەری بەنداوەكەش ئاشكرای دەكات، پێویستییان بە 30 ملیۆن دۆلارە بۆ چاككردنەوەی بەنداوەكە.

ڕەحمان خانی بەڕێوەبەری بەنداوی دەربەندیخان تایبەت بەناس كورد-ی راگەیاند: "ماوەیەك پێش ئێستا لیژنەیەكی هاوبەشی حكومەتی عێراق و حكومەتی هەرێمی كوردستان سەردانی بەنداوی دەربەندیخانیان كرد، بۆ زانینی توانای بەنداوەكە بە تایبەتی دوای ئەو زیان و زەرەرانەی كە لە ئەنجامی بومەلەرزەكەی ساڵی پار پێیگەیشتبوو".

 "دوای پشكنێكی وردی زانستی و دڵنیابوون لە ئاستی سەلامەتی بەنداوەكە، لیژنەكە بریاریداوە ئەمساڵ بەنداوەكە 12 مەتر ئاو لە ساڵی پار زیاتر گلبداتەوە و 3 مەتر بمێنێتەوە بۆ ڕاگرتنی سەلامەتی بەنداوەكە" ڕەحمان خانی وای وت.

وتیشی: "بەردەوام 24 كاتژمێر چاودێری بەنداوەكە دەكرێت لەلایەن تیمێكی ئێشکگری تایبەتەوە، هەماهەنگییەكی تەواو هەیە لەگەڵ بەنداوەکانی خواروو، بەتایبەتی لەگەڵ بەنداوی 'حەمرین' لە دیالە بۆ ڕێگرتن لە ڕوودانی لافاو".

 بەڕێوەبەری بەنداوی دەربەندیخان ئاماژەی بەوەشکرد، بەپێی پشكنینی لیژنەیكی تایبەت لە شارەزایانی بیانی، لە سندوقی نەختێنەیی نێودەوڵەتی، بەنداوەكە پێویستی بە 30 ملیۆن دۆلارە، بۆ ئەوەی بگەڕێتەوە دۆخی پێش بومەلەرزەكە.

ڕەحمان خانی باسیلەوەشکرد، ماوەی سێ ڕۆژە ڵاتی ئێران بە تەواوی توانایەوە بەنداوی داریانی بەرداوەتەوە و ڕێژەیەكی زۆر ئاو دێتە ناو بەنداوی دەربەندیخان، کە لە یەک چرکەدا 900 مەتر سێجا ئاو دێتە ناو بەنداوەکەوە.

دواین لیژنەش سەردانی بەنداوی دەربەندیخانیان کردبێت، لەسەر ڕاسپاردەی سەرۆکی پەرلەمانی عێراق بووە، کە دوێنێ یەکشەممە لیژنەیەکی پەرلەمانی سەردانی بەنداوەکەیان کردووە بۆ لە نزیکەوە ئاگاداربوون لە بارودۆخی بەنداوەکە.