گه‌ڕان

Shadow Shadow
سیاسه‌تی

قەڵادزێ: دوو تۆمەتبار دەستگیركران

2019.04.04 - 21:07
App store icon Play store icon Play store icon
قەڵادزێ: دوو تۆمەتبار دەستگیركران

کەناڵی ناس کورد لە تێلیگرام جۆین بکە   

ناس كورد-

بەتۆمەتی هەڕەشەكردن و تەقەكردن لەخەڵك و دزینی ئۆتۆمبێل، هێزە ئەمنییەكانی قەڵادزێ‌ دوو تۆمەتباریان دەستگیركرد.

لەراگەیەندراوێكی بەڕێوەبەرایەتی پۆلیسی راپەڕین كە وێنەیەكی دەست (ناس كورد) كەوتووە، ئاماژە بەوە كراوە "پاش بەدەستهێنانی زانیاری نوسینگەی نەهێشتنی تاوانی پشدەر بە هاوكاری بنكەی پۆلیسی ناحیەی سەنگەسەر و یاریدەدەریەتی ئاسایشی قەڵادزێ دوو كەسیان دەستگیر كرد بەناوەكانی (ع. ز.ڕ) لەدایكبووی ساڵی 1981 دانیشتووی قەڵادزێ گەڕەكی ڕاپەڕین، تۆمەتباری دووەم بەناوی (ئ.غ.م) لەدایكبووی ساڵی 1994 دانیشتووی كەركوك گەڕەكی ئازادی، لەبەردەم پۆلیسی دادگا دانیان ناوە بە تاوانەكەیدا و بەوتەی خۆیان لەڕێگەی بەكارهێنانی چەك و چەقۆ هەڕەشە و تەقەیان لەخەڵك كردووە و تۆمەتباری یەكەمیش پێشتر ماڵی لە هەولێر بووە، بەڵام ماوەیەك بەرلەئێستا ماڵەكەی گواستۆتەوە بۆ قەڵادزێ".

بەپێی راگەیەندراوەكە، پاش لێكۆڵینەوە لەگەڵیاندا بە وتەی خۆیان هەستاون بە دزینی 5 ئۆتۆمبێل لە جۆرەكانی (توێتا/ كرۆلا) و (توێتا/ كرۆلا، تكسی) و (توێتا/ پیكاب) و ( سەنی/نیسان) و ئۆتۆمبێلێكی تری بارهەڵگر، وە پاشان ئۆتۆمبێلەكانیان لە بازاڕ فرۆشتووە.

راگەیەندراوەكەی بەڕێوەبەرایەتی پۆلیسی راپەڕین، روونیدەكاتەوە كە تۆمەتبار (ع. ز. ڕ) دانی ناوە بەوەشدا لەشاری هەولێر دوكانێكی مۆبایلیان بڕیووە و 7 مۆبایل-یان بردووە، دەشڵێت لە هەمان شار تەقەی لە هاوڵاتیەك كردووە و پاشان برینداری كردووە و لەسەر ئەو ڕووداوەش لە لایەن دادگای هەولێر فەرمانی دەستگیركردنی بۆ دەرچووە.
راگەیەندراوەكە جەخت دەكاتەوە، بە بڕیاری دادوەر و بە ماددەی 443 لە ئێستادا (ع.ز.ڕ) راگیراوە و لێكۆڵینەوەش لەگەڵیدا بەردەوامە و تۆمەتباری دووەمیش كە ئێستا لە نەخۆشخانە چارەسەری بۆ دەكرێ لە ژێر چاودێری دایە، مەلەفی لێكۆڵینەوە بۆ ڕووداوەكە كراوەتەوە و لێكۆڵینەوەش بەردەوامە.