گه‌ڕان

Shadow Shadow
سیاسه‌تی

ئاسایشی هەولێر دانپێدانانی گروپێكی تاوانكار ى بڵاوكردەوە

2019.04.04 - 16:19
App store icon Play store icon Play store icon
ئاسایشی هەولێر دانپێدانانی گروپێكی  تاوانكار ى بڵاوكردەوە

کەناڵی ناس کورد لە تێلیگرام جۆین بکە   

ناس كورد-

بەڕێوەبەرایەتی ئاسایشی هەولێر راگەیەندراوێكی لەبارەی دەستگیركردنی گروپێكی "تاوانكار" و گرتەی ڤیدیۆیی دانپێدانانی گروپەكە، بڵاوكردەوە.

لەراگەیەندراوەكەی بەڕێوەبەرایەتی ئاسایشی هەولێر، ئاماژە بەوە كراوە "دوای روودانی دوو كردەوەی تاوانكارانە، لێكۆڵینەوە و چاودێری وردی تیمەكانمان دەستیپێكرد و لە ئۆپەراسیۆنێكدا چوار ئەندامی گروپێكی تاوانكار دەستگیركران، كە یەكێكیان ئافرەتە و دوو تاوانكاری دیكەی گروپەكەش دەستنیشانكران و فەرمانی گرتنیان بۆ دەرچووە".

دەقی راگەیەندراوەكەی بەڕێوەبەرایەتی ئاسایشی هەولێر:

دوای روودانی دوو كردەوەی تاوانكارانە، لێكۆڵینەوە و چاودێری وردی تیمەكانمان دەستیپێكرد و لە ئۆپەراسیۆنێكدا چوار ئەندامی گروپێكی تاوانكار دەستگیركران، كە یەكێكیان ئافرەتە و دوو تاوانكاری دیكەی گروپەكەش دەستنیشانكران و فەرمانی گرتنیان بۆ دەرچووە.

بە پێی دانپێدانانی تاوانباران (سهیلە خالد سلگان رحیمی) لەگەڵ هاوسەرەكەی بەناوی (هەردی محمد سمایل) پیلانی ئەو دوو كردەوەیان داناوە، ئەمەش بۆ كەمكردنەوەی سزای بەندكردنی (هەردی)، كە سێ ساڵە بەهۆی كوشتنی هاوڕێیەكی خۆی بەناوی (جێگر عبداللە عزیز) دەستگیركراوە و لەلایەن دادگاوە حوكمدرا بە پازدە ساڵ بەند كردن.

سهیلە، داوای لە كەسێكی نزیكی خۆی كردووە بە ناوی (احمد ئازەری- هەڵگری رەگەزنامەی وڵاتی ئێران) لەبەرانبەر پێدانی بڕی "سەد ملیۆن تومەنی ئێرانی" یەكێك لە شوبراكانی یان ئەندامێكی دیكەی خێزانەكەیان بكوژێت، تاوەكو ماڵی (جێگر)ـی كوژراو تۆمەتبار بكرێن بە تۆڵەكردنەوەی خوێنی كوڕەكەیان، دواتر هەردوولا ناچارببن سوڵح بكەن و سزای حوكمدانی (هەردی) كەمبكرێتەوە.

احمد ئازەری، بەهۆی بازرگانیكردنی لەگەڵ (بارزان عزیز ابراهیم) پەیوەندی هەبووە و چەند جارێك هاتووەتە هەولێر، دواتر داوای لە هەریەك لە (بارزان عزیز ابراهیم، هەڵگورد صابر گە، بەختیار ئیسماعیل و هەژار صابر گە) كردووە، هاوكاری بكەن بۆ كارێكی دژ بە براكانی هەردی حوكمدراو.

لە شارۆچكەی تەقتەق، نارنجۆكێكی دەستی "رومانە" دەكڕن و دواتر لەلایەن تاوانباری داواكراو (هەژار صابر گە) ئامادە دەكرێت و لەنێو قوتویەكی دۆشاوی تەماتە، لە ١٥/١/٢٠١٩ لە پێش ماڵی یەكێك لە برایەكانی هەردی بەناوی (دلێر محمد سمایل) دادەنرێتەوە و بە دوو كرێكاری ژینگەپارێزی شارەوانیدا دەتەقێتەوە، ئەم كردەیە بووە هۆی گیان لەدەستدانی ژینگەپارێزێكی شارەوانی بەناوی (محمد سەجیب حسێن) و بریندار بوونی كارمەندێكی هاوپیشەی، كە هەڵگری رەگەزنامەی وڵاتی بەنگلادیش بوون.

دووەم كردەوەی تێكدەرانەیان لە ٥/٣/٢٠١٩ بوو، كاتێك سهیلە داوا لە تاوانباری داواكراو (احمد ئازەری) دەكاتەوە، كردەیەكی دیكە بكەن. تاوانباری هەڵاتوو (احمد ئازەری) لە رێگەی تاوانباری داواكراو (هەژار صابر گە) نارنجۆكێكی دیكە لە ماڵی برایەكی هەژار بەناوی (هەڵگورد صابر گە) ئامادە دەكەن، لە پێش ماڵی برایەكی دیكەی حوكمدراو هەردی، بەناوی (دەشتی محمد سمایل) لە گەڕەكی زیلانی هەولێر، نارنجۆكە ئامادەكراوەكە دادەنرێتەوە و بە هاوسەری (دەشتی) و كچەكەیدا تەقیەوە و بووە هۆی بریندار بوونیان.

هەوڵەكانی بەڕێوەبەرایەتی ئاسایشی هەولێر، بەردەوامە بۆ دەستگیركردنی هەردوو تاوانباری داواكراو (احمد ئازەری) و (هەژار صابر گە) و دڵنیاییش دەدەینە هاووڵاتییان، كە ئەم دوو كردەوەیە تەنها كاری تاوانكارانە بووە.

بەرێوەبەرایەتی ئاسایشی هەولێر، 4/4/2019.