Shadow Shadow

ناس كورد زانیاری نوێ‌ لەبارەی پاسی شەوانی سلێمانی بڵاودەكاتەوە

22:52 هه‌ینی 15 ئادار 2019
article image

 

 

ناس كورد-شۆڕش محەمەد

 

هەندێك رۆتیناتی ئیداری ماوە و ئیتر پڕۆژەی پاسی شەوان لەشاری سلێمانی دەكەوێتە بواری جێبەجێكردن و هاوڵاتیان دەتوانن بەشەو تەنها بە 500 دینار لەنێو شاردا هاتوچۆ بكەن، بەڕێوەبەری گواستنەوە‌و گەیاندنی پارێزگای سلێمانیش وردەكاری پڕۆژەكە بۆ ناس كورد ئاشكرا دەكات.

 

ماوەی چەند مانگێکە لە شاری سلێمانی ئامادەکاری دەکرێت بۆ دابینکردنی پاسی گواستنەوەی هێڵەکان لە شەوانە، ئێستاش پرۆژەکە بەشی زۆری کارەکانی تەواوبووە.

 

سدیق محەمەد بەڕێوەبەری گواستنەوە و گەیاندنی پارێزگای سلێمانی تایبەت بە ناس كورد-ی ڕاگەیاند پڕۆژەکە رەزامەندی لایەنە پەیوەندیدارەكانی سلێمانی بۆ وەرگیراوە و ئێستا لای پارێزگای سلێمانییە.

پاس بۆ گواستنەوەی ھاوڵاتیان بە شەو دەخرێتەکار

ناس كورد زانیوویەتی هۆكاری دواكەوتنی جێبەجێكردنی پڕۆژەكە بۆ ساغنەبوونەوەی پڕۆژەكە بووە لەژێر سایەی یاسای وەبەرهێنان یاخود خزمەتگوزاری،  دواتر وەك پڕۆژەیەكی وەبەرهێنان ساغ بووەتەوە.

 

سدیق محەمەد دڵنیایی ئەوە دەدات كە خاوەنی پڕۆژەكە لەسەرەتادا بەلانی كەمەوە شەش مانگی سەرەتا زەرەری ماددی دەكات و كاتی دەوێ‌ تا خەڵك رادێت لەگەڵ ئەو شێوازە لە گواستنەوەی گشتیدا.

 

هیوای ئەوەشی خواست دوای نەورۆز رێكارە ئیدارییەكانی پڕۆژەكە لەپارێزگای سلێمانی تەواو بێت و دوای ئەوە گرێبەست لەگەڵ كۆمپانیاكە بكەن و جۆری پاسەكان دەستنیشان بكەن.

 

بەڕێوەبەری گواستنەوە و گەیاندنی پارێزگای سلێمانی جەخت لەسەر ئەوە دەكاتەوە كە مەرجی قورسیان بۆ كۆمپانیای جێبەجێكاری پڕۆژەكە داناوە و مۆدیلی پاسەكان دەبێت لە 2017 كەمتر نەبێت و سیستمی گەرمی و ساردی تیایدا بەردەوام كار بكات و پاسی گەورە بن وەك ئەو پاسانەی كە لەوڵاتانی دەرەوە هەیە و هاوشێوەی پاسە بچووكەكانی ئێستای شاری سلێمانی نەبن.

 

Image result for ‫پاس شەو‬‎

ڕێکخەرانی پڕۆژەکە لەسەرەتادا سلێمانیان كردووە بە دوو زۆنەوە (رۆژهەڵات و رۆژئاوا)، بەجۆرێک پاسەكان لەسەرەتادا بەرەو ئەو جێگانە دەچن كە هاووڵاتیان بەشەودا رووی تێدەكەن وەك مۆڵ و پارك و نەخۆشخانەكان و دواتر بەپێی پێویستی ژمارەی پاس زیاد دەكەن بۆ تەواوی گەڕەكەكانی شاری سلێمانی.

 

“یەكێك لەخاڵە گرنگەكان ئەوەیە ئەم پاسانە بەسیستمی كات كاردەكەن نەك نەفەر. واتا بەپێی كاتێكی دیاریكراو دەجوڵێت و نرخەكەشی هەر وەكو نرخی رۆژە و تەنها 500 دیناری عێراقییە،” سدیق محەمەد وادەڵێت.

 

پێشبینی ئەوەشی كرد بەكەوتنە بواری جێبەجێكردنی ئەو پڕۆژەیە ئیدی ناو بازاڕەكانی شاری سلێمانی و فرۆشگاكانیش بەشەو بەڕووی هاووڵاتیاندا بكرێنەوە و جموجۆڵی بازاڕكردن لەشەویش بەردەوام بێت هەر وەك بەیانیان.

وشە كلیلەكان:

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل