fbpx
Shadow Shadow

"داعش تائێستا لەبارەى تەقینەوەکانى کەرکوکەوە هیچى نەوتووە"

 کێ لەپشت تەقینەوەکانى کەرکوکەوەیە؟

21:47 دوو شه‌ممه‌ 03 حوزه‌یران 2019
article image

ناس کورد- وریا حسێن

هەفتەیەک تێپەڕیوە بەسەر تەقینەوەکانى کەرکوکدا، نە داعش بەرپرسیارییەتى تەقینەوەکانى گرتە ئەستۆ، نە هێزەکانى پۆلیس زانیاریان لەوبارەیەوە خستووەتەڕوو، ئەوەش جێگەى گومانى چاودێرانى شارەکەیە.

.

شەوى 30ى ئایارى 2019 شەش تەقینەوە لەسەر ڕێگاى بەغداد کەرکوک ڕویدا، بەهۆیەوە 26 کەس برینداربوون و 3 کەس گیانیانلەدەستدا.

.

عەمید ئەفراسیاو کامل، وتەبێژی پۆلیسی کەرکوك لەوبارەیەوە بۆ ناس کورد جەختى لەسەر ئەوەکردەوە وەک پۆلیس تائێستا زانیارى تەواویان لانیە ئەو پرسە لەسەرو ئەوانەوە لێکۆڵینەوە لەسەر دەکرێت و تائێستا ئەنجامى کۆتایى نەبووە، وتیشی: “زانیارى ئەوەم لانیە، کێ تەقینەوەکانى ئەنجامداوە”.

.

سەعد حەربیه فەرماندەی ئۆپراسیۆنەكانی كەركوك دواى 24 کاتژمێر لە تەقینەوەکان لەبارەى دەستى پشت تەقینەوەکانەوە بڕواى وابوو، تەقینەوەکان دەستى داعشى لەپشتەوە بێت، ئەوەش لەئەنجامى ئەو ئۆپراسیۆنانەى کە چەند ڕۆژێک پێش تەقینەوەکان لە باشورى کەرکوک دەستى پێکردووە، ئەوەشى ئاشکرا کرد، “رێكخراوەكه به دانانی بۆمب لهناو تەنەكەی خۆڵوخاشاك و كەنار رێگاكان دەیەوێت هاوڵاتیان بكاته ئامانج”، بەڵام پێچەوانەى نەریتى داعش کە دواى کردەوە سەربازییەکانى بەرپرسیارییەتى ڕادەگەیەنێت، تا ئێستا داعش بەرپرسیارییەتى ئەو تەقینەوانەى نەگرتووەتە ئەستۆ.

.

لەوبارەیەوە لەتیف فاتیح فەرەج، نوسەر و شارەزاى دۆخى کەرکوک شیکردنەوەیەکى وردى بۆ ناس کورد کرد، ئاماژەى بۆ ئەوەکرد بەگوێرەى ئەو ئەزمونانەى هەبوون شێوازى داعش وابووە کە هەر دواى تەقینەوەکان بەرپرسیارییەتى خۆى ڕابگەیەنێت، بەڵام لەم دۆسیەیەدا داعش هیچى نەوتووە ئەوەش گومانى زۆرى دروستکردووە، وتیشى: “بەدڵنیاییەوە گومان لەسەر ئەنجامدەرانى تەقینەوەکان هەبووە، بەو پێیەیى چەند ڕۆژێک پێش تەقینەوەکان هەواڵگرى عێراق بەهۆى بوونى زانیارى هێزى لەو ناوچەیە کۆکردووەتەوە کە تەقینەوەکانى تێیدا ڕویداوە، تەنانەت بەهۆیەوە خەڵک بێزاربووە، بۆیە شەوى تەقینەوەکان هێزەکە تۆزێک کەمکراونەتەوە”.

.

ئەو شارەزایەى دۆخى کەرکوک گومانەکانى لەسەر تەقینەوەکان ناشارێتەوە تەنانەت گومانى هەیە تەقینەوەکان دەستى ناوخۆیى تێدابێت، دەشڵێت: “ئەم ناوچەیە پڕیەیتى لەململانێ و هەموو ئەوانەشى ململانێ دەکەن کەرەستەى سەربازییان لەبەردەستە بۆیە دەگونجێت دەستى ناوخۆى تێدا بێت”.

.

تائێستا هێزە ئەمنییەکان هیچ ڕونکردنەوەیەکیان لەبارەى تەقینەوەکانەوە نەخستووتەڕوو، بەڵام دەنگۆ هەیە لەسەر ئەوەى چەند کەسێک لەسەر ئەو تەقینەوانە دەستگیرکراون بەبێ ڕونکردنەوەى زیاتر.

.

ئازاد جەبارى سەرۆکى لیژنەى ئەنجومەنى پارێزگاى کەرکوک، بەدەنگى ئەمەریکاى راگەیاندووە، “تەقینەوەکان دەستێکە بۆ تێکدانى دۆخى ئەمنى و نانەوەى پشێوى، ئەگینا هیچکام لە بۆمبەکان بارەگاى حیزب و هێزە سەربازییەکانى نەکردبوە ئامانج.”

.

جەبارى وتیشی: “گومان دەکرێت دەستى سیاسى لەپشتەوە بێت، یاخود داعشیش ناوبەناو کارى وادەکات بۆ نانەوەى پشێوى.”

.

تەقینەوەکانى کەرکوک لەکاتێکدابوون دۆخى پێکهاتەى کورد و پێکهاتەکانى دیکە لەوپەڕى ئاڵۆزیدابوو، ئەوەش گومانى دروستکردووە کە، “دەستێکى شاراوەى دەیەوێت ئاژاوە دروست بکات”، وەکو سەرۆکى لیژنەى ئەمنى جەختى لێکردەوە.

.

.

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل