fbpx
Shadow Shadow

سیاسه‌تی

"چارەسەرەکە کاتییە و دەبێت ماددەى 140 جێبەجێ بکرێت"

“چارەسەرى کێشەکانى جوتیارانى کوردى کەرکوک” پارتى و یەکێتى بەجیا بە دەستکەوتى خۆیانى دەزانن

12:32 پێنج شه‌ممه‌ 23 ئایار 2019
article image

ناس كورد- هەڤاڵ فەتاح

یەکێتى لە کەرکوک ڕایدەگەینێت، لەسەر ڕاسپاردەى سەرۆککۆمارى عێراق کێشەى زەوى و زارى گوندە کوردییەکانى سنورەکە چارەسەر کراوە، لە بەرامبەریشدا ئەندامێکى ئەنجومەنى پارێزگاکە دەڵێت، لە ئەنجامی پەیوندی تەلەفۆنی مەسعود بارزانى بۆ سەرۆکوەزیرانى عێراق کێشەکان چارەسەر کراون.

.

نوسەرێکى کوردى دانیشتوى کەرکوکیش ڕەخنە لەوە دەگرێت یەکێتى و پارتى پرسى چارەسەرى کێشەى جوتیارانى کوردى سنورى کەرکوک بە دەستکەوتى خۆیان دەزانن و دەڵێت چارەسەرێکى کاتییە.

.

"چارەسەرى کێشەکانى جوتیارانى کوردى کەرکوک" پارتى و یەکێتى بەجیا بە دەستکەوتى خۆیانى دەزانن

“لەسەر ڕاسپاردەى سەرۆککۆمارى عێراق کێشەى جوتیارانى سنورى کەرکوک چارەسەر کرا”

مەڵبەندى یەکێتى لە پارێزگاى کەرکوک لە راگەیەندراوێکدا ئاماژەیان بەوە کرد: “لەسەر راسپاردەی سەرۆككۆماری عیراق بۆ چارەسەركردنی كێشەی زەوی و زارە كشتوكاڵییەكانی سنورەكانی (پەڵكانە و سەرگەڕان و دوبز) لیژنەیەكی بەپەلە و هاوبەش پێكهێندرا، لیژنەكە بڕیاریدا بە هەڵوەشاندنەوەی ئەو بڕیارەی كە لەلایەن قیادەی قواتی عەمەلیاتی سەڵاحەدینەوە دەرچووبوو، بۆ رێگریكردن لە دوورینەوەی بەروبومی بەرهەمی جوتیارە كوردەكانی ئەو سنورە، جوتیارە کوردەکان دەتوانن چیدیکە بەروبومەکانیان بدورنەوە”.

.

 

لەوبارەیەوە كاكە ڕەش سدیق ئەندامى ئەنجومەنی پارێزگای كەركوك بە ناس كورد-ی راگەیاند: “من وەك نوێنەری كورد لەو لیژنەیەى بە بریارى سەرۆککۆمار دروست کرا بەشدار بووم، کە پارێزگارى كەركوك و نوێنەری ئەنجومەنی سەرگەڕان و بەڕێوەبەری ناحیەى پەڵكانە و نوێنەری عەرەبەكانیشی تێدابوو، ڕێككەوتین لەسەر سێ‌ خاڵ، یەكەمیان جوتیارە كوردەكان بەروبومى خۆیان بدوورنەوە، دووەمیش ئەوەیە كێشەی موڵكایەتی ئەو زەوییانە دەبێت لەلایەن دادگاوە ساغبكرێتەوە و خاڵی سێیەمیش پابەندبوونی  لایەنەكانە بە هەر بڕیارێكی ئەنجومەنی وەزیرانەوە”.

.

 

ئەندامەکەى یەکێتى لە ئەنجومەنی پارێزگای كەركوك، نەیشاردەوە ئەگەرى سەرهەڵدانەوەى ئەو کێشانە هەیە، چونكە بەرای ئەو 50%ى كێشەكان چارەسەر كراون نەک سەرجەمیان، دەشڵێت: “تاکە گرەنتى بۆ چارەسەرى تەواوى کێشەکان جێبەجێکردنى ماددەى 140ى دەستورە”.

.

"چارەسەرى کێشەکانى جوتیارانى کوردى کەرکوک" پارتى و یەکێتى بەجیا بە دەستکەوتى خۆیانى دەزانن

“پەیوەندى تەلەفۆنى نێوان بارزانى و سەرۆکوەزیرانى عێراق بابەتەکەى چارەسەر کرد”

لە بەرامبەردا محەمەد كەمال سەرۆكی لیستی برایەتی لە ئەنجومەنی پارێزگای كەركوك، کە هاوکات ئەندامى نوێنەرى پارتییە لەو ئەنجومەنە، بە ناس كورد-ی ڕاگەیاند: “كێشەی پەڵكانە لە ئەنجامی پەیوەندییەكی تەلەفۆنی نێوان بارزانی و سەرۆكوەزیرانی عێراق عادل عەبدولمەهدی چارەسەر كرا، نەك بە ڕاسپاردەی سەرۆككۆمار كە هەندێ‌ لایەن بانگەشەى بۆ دەکەن”.

.

محەمەد کەمال وتیشی، هۆكاری ڕوودانی كێشەكە حەشدی شەعبی و پۆلیسی فیدراڵییە بە هاوكاری پارێزگاری كەركوك راكان جبورى، هاوڕابوو لەگەڵ نوێنەرەکەى یەکێتى و ڕایگەیاند، كێشەكان بە كاتی چارەسەر كراون و ئەگەری هەیە چەندین جارى دیکە سەر هەڵبدەنەوە،

.

چەند ڕۆژێك لەمەوبەر بە فەرمانی فەرماندەیی ئۆپەراسیۆنەكانی پارێزگای سەلاحەدین، ڕێگری لە جوتیارە كوردەكانی ناوچەی پەڵكانە كرا کە بچنەوە سەر زەوییەكانیان و دروێنەی بەروبومەكانیان بکەن، ئەمش كاردانەوەی زۆری بە دوای خۆیدا هێنا.

.

 

 

"چارەسەرى کێشەکانى جوتیارانى کوردى کەرکوک" پارتى و یەکێتى بەجیا بە دەستکەوتى خۆیانى دەزانن

“نابێت یەکێتى و پارتى چارەسەرێکى کاتى بە دەستکەوت بزانن”

نوسەر و ڕۆژنامەنوس لەتیف فاتیح فەرەج، ڕەخنە لەو جۆرە مامەڵەیەى یەکێتى و پارتى دەگرێت و دەڵێت، نابێت ئەو چارەسەرە کاتییانە وەک دەستکەوت باس بکرێت و بفرۆشرێتەوە، وتیشی: “ئەم بابەتە دەبێت بە ماددەى 140ى دەستورى چارەسەر بکرێت، نابێت ئەم جۆرە چارەسەرە کاتییانە وەک دەستکەوت لەلایەن یەکێتى و پارتییەوە باس بکرێن”.

.

ئەو نوسەرە کە هاوکات دانیشتووى کەرکوکە، پێشنیازى ئەوەى کرد، پەیوەندییەکانى نێوان کورد و عەرەبى کەرکوک ئاسایی بکرێنەوە بە تایبەت پەیوەندییە کۆمەڵایەتییەکان، ئاماژەى بەوەشکرد، پێویستە لەسەر مێزى گفتوگۆ لەنێوان بەغداد و هەرێمدا ماددەى 140 زیندو بکرێتەوە و هەوڵى جێبەجێکردنى بدرێت.

.

لەبارەى هۆکارەکانى جێبەجێنەکردنى ماددەى 140وە، لەتیف فاتیح فەرەج وتى، 50%ى هۆکارى جێبەجێنەکردنى ئەو ماددە دەستورییە لە ئۆباڵى کورد خۆیدایە و هۆکاربووە بۆ مراندنى ئەو ماددەیە.

.

.

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل