fbpx
Shadow Shadow

دۆخەکە بەمەترسیدار لەقەڵەم دەدرێت

پنتاگۆن: هێرشەکانمان بۆ سەر بارەگاکانى حەشدى شەعبى درێژەیان دەبێت

23:36 یه‌ك شه‌ممه‌ 29 کانونی یەکەم 2019
article image

ناس كورد-

وەزیرى بەرگرى ئەمریکا ئاشکراى کرد، هێرشەکانیان بۆ سەر باره‌گاكانی حەشدى شەعبى درێژەیان دەبێت و عەبدولمەهدیش ڕوداوەکە بەمەترسیدار دەزانێت و بۆ ئەو مەبەستەش داواى کۆبونەوەى بەپەلەى ئەنجومەنى ئاسایشى نیشتیمانى وڵاتەکەى دەکات.

.

 

عادل عەبدولمەهدى سەرۆکى حکومەتى کاربەڕێکەرى عێراق و هاوکات فەرماندەى گشتى هێزە چەکدارەکانى عێراق ڕاگەیەنراوێکى لەسەر ڕوداوى هێرشکردنە سەر بارەگاکانى حزبوڵاى عێراقى و حەشدى شەعبى لەلایەن ئەمریکاوە بڵاو کردەوە.

.

فەرماندەى گشتى هێزە چەکدارەکانى عێراق ڕایگەیاند، ئەو کارەى ئەمریکا پەڕەسەندنێکى مەترسیدارە.

.

دەشڵێت ئەو هەڵسوکەوتە تاکلایەنە و کارى لەو جۆرە ئاسایشى  ناوچەکە دەخاتە مەترسیەوە.

.

دواى دەستلەکارکێشانەوەى و بەردەوامى لەسەرپەرشتى کردنى حکومەتى کاربەڕێکەر ئەوە یەکەمینجارە فەرماندەى گشتى هێزە چەکدارەکان ڕاگەیەنراوى فەرمى بڵاو بكاته‌وه‌.

.

لەڕاگەیەنراوێکیشدا عەسائیبى ئەهلى هەق ئیدانەى هێرشەکەى ئەمریکاى کرد و بەدوژمنایەتیکردنى حەشدى شەعبى زانى.

.

ئاماژەى بۆ ئەوەش کرد، بەردەوامێتى پێشێلکارییەکانى ئەمریکا بۆ سەر سەروەرییەکانى خاکى عێراق پێویستى بەڕووبەڕووبونەوەى توندو ئازایانە هەیە و ئەو هێرشانەشى کە پێشتر ئیسرائیل کردوونیەتە سەر بارەگاکانیان دەریخستووە بەرەى دوژمنه‌کانیان یەکە.

.

ئەو ڕێکخراوە کەسەر بەچەکدارانى حەشدى شەعبیە جەختى لەوەش کردووەتەوە ئەو کارەى ئەمریکا پاڵی پێوەنان هەمویان بەڕویاندا بوەستنەوە و لەعێراقدا دوریان بخەنەوە.

.

هاوکات وتەبێژى فەرماندەى گشتى هێزە چەکدارەکانى عێراق ئاشکراى کردووە، وەزیرى بەرگرى ئەمریکا بە عادل عەبدولمەهدى وتوە ئەو هێرشە بۆ سەر حەشدى شەعبى درێژەیان دەبێت.

.

ئەو بەرپرسە ئاماژەى بۆ ئەوەش کردووە، سەرۆک وەزیرانى کاربەڕیکەرى عێراق لەسەر ڕوداوەکە داواى کۆبونەوەى بەپەلەى ئەنجومەنى ئاسایشى نیشتیمانى عێراق کردووە.

.

هه‌روه‌ها بەدر زیادی، ئەندامی لیژنەی ئاسایش و بەرگری پەرلەمانی عێراق، راگه‌یه‌ندراوێكی له‌باره‌ی په‌یوه‌ندییه‌كی‌ ته‌له‌فۆنیی عادل عه‌بدولمه‌هدی و سه‌رۆكی لیژنه‌ی ئاسایش و به‌رگری له‌ په‌رله‌مانی عێراق بڵاوكرده‌وه‌‌ و تیایدا ئاماژه‌ی به‌وه‌ كرد “ئەمشەو، دوای بۆردومانەکەی ئەمریکا بۆ سه‌ر چه‌ند باره‌گایه‌كی حه‌شدی شه‌عبی له‌ ئه‌نبار، عادل عەبدولمەهدی سەرۆک وەزیرانی کاربەڕێکەری عێراق کە هاوکات فەرماندەی گشتی هێزە چەکدارەکانە پەیوەندییەکی تەلەفۆنی لەگەڵ ڕەزا ئال حەیدەر سەرۆکی لیژنەی ئاسایش و بەرگریی پەرلەمانی عێراق ئەنجامدا”.

.

بەدر زیادی، ئاماژەی بەوەدا :”پەیوەندیە تەلەفۆنییەکە دەربارەی بۆردومانەکەی ئێوارەی ئەمڕۆی ئەمریکییەکان بوە بۆ سەر بنکەکەی حزبوڵای عێراقی لەڕۆژئاوای ئەنبار، بۆ ئەوەی بەهاوبەشی لەگەڵ بەرگری ئاسمانی عێراقیدا ڕاپۆرتێکی تەواو بدەنە حکومەت کە دەریبخەن ئەو بۆردومانە لە کوێوە ئەنجام دراوە و فڕۆکەکان لە کوێوە هەستاون بەو بۆردومانە”.

.

پەرلەمانتارەکەی لیژنەی ئاسایش و بەرگری عێراق جەختی لەوەکرده‌وە :”لە پەیوەندییەکەدا باس لەوەش کراوە کە دەبێت لیژنەکەمان ڕاپۆرتێک ئامادە بکات و لە دانیشتنی سبەینێدا بیخەینەڕو لەسەر ئەو بۆردومانە بۆ ئەوەی بڕیارێکی یەکلاکەرەوە بدەین له‌و باره‌یه‌وه‌”.

.

 

هه‌ر له‌سه‌ر ئه‌و رووداوه‌ ئەبو ئەحمەد بەسری، وتەبێژ بەناوی کەتائیبی حیزبوڵا‌ی عێراقی ڕایگەیاند :”هێزەکانیان لە ئامادەباشیدان بۆ تۆڵەکردنەوەی ئەو هێرشانەی کراوەتە سەریان و هێرشەکان بێ وەڵام نابن”.

.

ئەبو ئەحمەد بەسری وتوشیەتی :”لە ئێستادا چاوەڕێی فەرمان دەکەین بۆ ئەوەی هێرش بکەینە سەر بنكه‌ و بارەگاکانی ئەمریکا لە عێراق”.

.

وشە كلیلەكان:

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل