هەسەدە: لەدواى ئاگربەستەوە تورکیا و گروپە هاوپەیمانەکانى 108 هێرشیان کردووە

ناس کورد-

فەرماندەیی گشتى هێزەکانى سوریاى دیموکرات (هەسەدە) ڕایگەیاند، لەدواى ڕێککەوتنى ئاگربەستەوە، تورکیا و گروپە چەکدارە هاوپەیمانەکانیان 108 هێرشیان کردووە و 82 پێگەیان بە فڕۆکەى بێفڕۆکەوان بۆردومانکردووە.

.

فەرماندەییەکە لە بەیاننامەیەکدا ئاماژەى بەوەکردووە، تورکیا و گروپە هاوپەیمانەکانى پابەندنەبوون بە ڕێککەوتنى ئاگربەست کە لەگەڵ ئەمریکا واژۆی کردبوو بە راوێژکردن لەگەڵ هەسەدە، سەرەڕاى پابەندبوونى هەسەدە لەو بارەیەوە.

.

باسى لەوەشکردووە، “لەو ڕۆژەوە کە ئاگربەست ڕاگەیەنراوە تا ئێستا، تورکیا 1100 کیلۆمەتر چوارگۆشەى داگیرکردووە،کە 56 گوند و چەندین کێڵگە لەخۆدەگرێت لە عەین عیسا و کۆبانێ و سەرێکانى و تلتەمر”.

.

هەسەدە ئەوەشى خستووەتەڕوو، بەهۆى هێرشەکانى تورکیاوە، نزیکەى 30 هەزار هاوڵاتى مەدەنى ئاوارەبوون و بەدەیان کەسیش شەهید و برینداربوون، 182 شەڕڤانیش شەهیدبوون و 243 شەڕڤانى دیکەش برینداربوون.

.

ڕۆژى 17ى تشرینى یەکەمى ڕابردوو تورکیا و ئەمریکا ڕێککەوتنێکیان بۆ ئاگربەست لە ڕۆژئاواى کوردستان ڕاگەیاند و هەسەدەش پابەندبوونى خۆى بە ڕێککەوتنەکەوە ڕاگەیاند.

.

دواى ڕۆژێک لە ئاگربەستەکە هەسەدە تورکیا و گروپە هاوپەیمانەکانى بە شکاندنى ئاگربەست تۆمەتبارکرد.