fbpx
Shadow Shadow

نوێبوونەوە و رۆمانسیەت و حەماس كوجا مەرحەبا!

17:46 شه‌ممه‌ 07 کانونی یەکەم 2019
article image

بیروڕا- سوپا سەلام

بە هەموو پێوەرێك ئەنجامدانی كۆنگرە لە خۆ دزینەوەو دواخستنی باشترە،بەڵام ئەوەی مایەی هەڵوەستە لەسەر كردنە دەرئەنجامی كۆنگرەكەیە، كە پێویستە تینووێتی كادرو هەوادار و سنوری قەڵەمڕەوی (ی.ن.ك) بشكێنێ‌ لەپێداچوونەوە بەسەرجەم جومگە لەیەكترازاوەكانیدا.

.

یەكێتیی نیشتمانیی كوردستان كە لە ساڵی (1975)ەوە  دامەزراوە، هەنوكە تەنها سێ‌ كۆنگرەی ئەنجامداوە،كە هیچكام لە كۆنگرەكانی لە وادەی یاسایی خۆیاندا نەبوون،هەرچی ئەم كۆنگرەیەشە كە بڕیارە لە دوا رۆژەكانی ئەمساڵدا ئەنجام بدرێت دەبوو لە حوزەیرانی 2013 بەڕێوەبچوایە،بەڵام هەرجارە و بە پاساوێك دواخراوە ئەگەرچی لە رووكەشدا ئێستاشی لەگەڵدابێت سەرجەم ئاراستەكان لەگەڵ بەستنی كۆنگرەی چوارەمی حزبدان.

.

كۆنگرەی ئەمجارەی یەكێتیی نیشتمانیی كوردستان لە دۆخێكی بە عوقدە چنراوی ئاڵۆزدا ئەنجامدەدرێت كە گۆڕانكاریە ناوخۆییەكانی حزب و  ناوچەكەش وا دەخوازێت كە ریفۆرمێكی بنچینەیی بە كۆی گوتار و بەرنامە و پەیڕەو و پەیكەربەندی حزبدا بكرێت،كەئەم نوێبوونەوەیەش بە رۆمانسیەت و حەماسی ئەندامانی كۆنگرە ئەنجام نادرێت،وەلێ‌ بە یۆتۆبیا و سەنگەرگۆڕین و بازدان بەسەر پرەنسیپەكانیشدا ناگاتە مەنزڵ، بەڵكو بە كادری  ئەكادیمی و شارەزا لە گۆڕاوە سیاسیەكان، كە خاوەنی خوێندنەوەی خۆی بێت ئەم نوێبوونەوەیە ئەنجام دەدرێت،بەڵام ئەفسوس ئەو فۆڕمەی كە دەستنیشانی ئەندامانی كۆنگرەی پێدەكرێت كە بنەماكەی لەسەر تەرحكردنی لیست و لیستكاری و زۆرینە و كەمینە  بونیاد نراوە ،شتێك نیە جگە لە مۆدێلە كۆنەكەی خۆ سەپاندنەوەی زۆرینە كە سەرەنجامەكەشی شەرعیەت دانەوەیە بەو تابلۆیەی كە نزیكەی (10ساڵە) كادری ئەم حزبە دادو بێدادنیانە.

.

ئەمەش نەفاڵە نە ئیلهامی شاعیرێكی رەشبین، بەڵكو فاكتێكە و لە ئەنجامی غیابی كەرەسە مرۆییە ئەكتیڤەكەی بەشداربووی كۆنگرەوە سەرچاوەی گرتووە، چونكە ئەوەی تێبینی دەكرێت غروری كادر لەم قۆناغەدا بە ئەندازەیەكە پابەندی ئەوە نیە كە چی لە هەگبەی مەعریفەیدایەو لە كۆنگرەش چی پێشنیار دەكات،بەڵكو پابەندی ئەو جۆرە لیست و خۆ گۆڕین و قسەكردنەیە كە خۆی پێدەردەخات،دەردەكە هەر  ئەمەیە كە زۆرینەی ئەو كادرانەی كە دەرچوون یان لە كێبەركێی دەرچووندان لە غیابێكی قوڵی زانستی و نائەكادیمیدان، ئەم غیابی مەعریفەیەش جەسورتر و برسیتری كردوون بۆ ئەوەی بە هەر نرخێك بێت لەسەر كورسیەكی كۆنگرە دانیشن،بێ ئاگا لەوەی كە تاكە مەخلوقێك كە لە نەزانیندا ویقاری خۆی زۆر دەدۆڕێنێت سیاسیەكانن،كە تێناگەن لەم سەردەمی شۆڕشی زانستیەدا مەخلوقێكن بوون بە بەشێك لە رابردوو.

.

هەموو بونەوەرەكانی دی لە هەست كردن بە جەهلدا تێدەگەن و بوون بە بەشێك لە رابردوو كە پێویستە بواربدەن بە كەسانی دیكە تەنها كۆلكە سیاسی نەبێت،كە وادەزانێت هەمیشە كوڕی ئەو ساتەیە و بێئاگا لەوەی لەنێوان ئەو دنیادا دیوارێكی بەرز هەیە،ئەمەش ئەگەر بەشێكی پەیوەندی بەو ئالیەتەوە بێت كە لیژنەی ئامادەسازی كۆنگرە دایڕشتووە، بەشە گەورەكەی پەیوەندی بە بێ‌ ئیشی ئەم تایپەوە هەیە، كە دەتوانم بڵێم لە كاری جڤات و جوڵانەوەی سیاسیداهیچ مەخلوقێك لە كادرێكی بێ‌ ئیش موسیبەت تر نیە،بۆیە كە دەڕوانیتە ئەو لەشكرە لە كاندید و ئەندامی كۆنگرەیەی كە لە غیابێكی گەورەی زانستی و ئەكادیمدا خول دەخۆن و  بڕیارە (44 ساڵ) خەبات و خوێنی زیاتر لە (20 هەزار) شەهید رادەست بكەین،دەبێت بەختیار عەلی وتەنی بڵێین: (بەهـ بەهـ چ رەوزە و ریازێكی پڕ زانست و هونەرە حزب!).

.

 

 

وشە كلیلەكان:

ئەمانەش بخوێنەرەوە

Do NOT follow this link or you will be banned from the site!
عاجل عاجل