Shadow Shadow

لەسەر بۆردومانەکانی ئیسرائیل وەزارەتی دەرەوەی عێراق بەرپرسێکی باڵیۆزخانەی ئەمریکای بانگهێشتکرد

09:02 شه‌ممه‌ 24 ئاب 2019
article image

 

ناس کورد

لە بەیاننامەیەکدا وەزارەتی دەرەوەی عێراق ڕایگەیاندووە، بانگهێشتی هەڵسوڕێنەری کاروبارەکانی باڵیۆزخانەی ئەمریکا لە بەغدا کراوە بۆ بینای وەزارەتی دەرەوە.

.

میدیاکانی عێراق لەوبارەوە بڵاویانکردووەتەوە، ئامانجی بانگهێشتکردنە گەیاندنی نیگەرانییەکانی عێراق بووە لە بۆردوومانکردنی بارەگاکانی حەشدی شەعبی لە لایەن فڕۆکەکانی ئیسرائیلەوە.

.

وەزارەتی دەرەوەی عێراق لە بەیاننامەکەیەدا ئاماژەی بەوەکردووە، پەیوەندییەکانی بەغدا و واشنتن و چۆنیەتی بەرەوپێشبردنیان و ڕووبەڕوبوونەوەی تیرۆر گفتوگۆیان لەبارەوە کراوە.

.

لە بەیاننامەکەی وەزارەتی دەرەوەی عێراقدا ئاماژە بەوە دراوە کە محەمەد عەلی حەکیم وەزیری دەرەوە، بانگهێشتی براین مەکفیتەرزی هەڵسوڕێنەری کاروبارەکانی باڵیۆزخانەی ئەمریکا لە بەغدا کردووە، بەهۆی ئەوەی ماسیۆ تولەر باڵیۆزی ئەمریکا لە عێراق نەبووە.

.

محەمەد عەلی حەکیم جەختی لەوە کردووەتەوە کە عێراق پابەندە بە بنەمای دراوسێیەتی باش لەگەڵ وڵاتانی دراوسێی، بەجۆرێک کە ئاسایشی عێراق و ناوچەکە تیایدا پارێزراو بێت، و عێراق گۆڕەپانی ململانێ و ناکۆکییەکان نییە بەڵکو گۆڕەپانی بنیاتانان و گەشەپێدانە.

.

لە ماوەی مانگێکدا چوار بنکەی سەربازیی سەر بە حەشدی شەعبی تەقینەوە کە دواینییان رۆژی سێشەممەی رابردوو لە نزیک بنکەی ئاسمانیی بەلەد باکووری بەغدا، کرایە ئامانج.

.

رۆژی چوارشەممەی رابردووش، جێگری سەرۆکی دەستەی حەشدی شەعبی، ئەبو مەهدی موهەندیس، هێزەکانی ئەمریکای تۆمەتبار کردبوو بەوەی رێگەیان بە فڕۆکەی ئیسرائیلی داوە بە کردنە ئامانجی بارەگا سەربازییەکان لەناو خاکی عێراقدا.

.

بەپێی بەیاننامەکە، وەزیری دەرەوەی عێراق داوای کردووە ئەمریکا پابەندبێت بەجێبەجێکردنی بەندەکانی رێککەوتننامەی ستراتیژی هاوبەش لە نێوان عێراق و ئەمریکا لە بوارەکانی ئاسایش و ئابووری کە ببێتە هۆی بەهێزکردنی هەماهەنگییە هاوبەشەکان لە بوارە جیاجیاکاندا.

.

ساڵی 2008، عێراق ئەمریکا رێککەوتنێکی ئەمنییان واژوو کرد کە رێککەوتنی ستراتیژی هاوبەش ناسراوە بە ئامانجی بەهێزکردنی ئاسایش و سەقامگیری لە عێراقدا.

.

وشە كلیلەكان:

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل