fbpx
Shadow Shadow

لیژنەی دارایی پەرلەمانی عێراق وەڵامەکانی فواد حسێنی پەسەند نەکردووە

12:05 دوو شه‌ممه‌ 05 ئاب 2019
article image

ناس کورد- هەڤاڵ فەتاح

ئەندامێکی لیژنەی دارایی پەرلەمانی عیراق ڕایگەیاند، وەزیری دارایی بە پێچەوانەی یاسای بودجە کاری کردوە، بڕیاریشە لە وەرزی نوێی یاسادانانی پەرلەماندا بۆ لێپرسینەوە بانگهێشتی پەرلەمان بکرێت.

.

ناجی ڕدەیس، ئەندامی لیژنەی دارایی پەرلەمانی عێراق، لە فراکسیۆنی سائرونی سەر بە موقتەدا سەدر، بە ناس کوردی ڕاگەیاند: “دوای کۆبوونەوە هاوبەشەکەی نێوان ئەندامانی لیژنەی دارایی، نەوت و گازی پەرلەمانی عێراق، وەزیری دارایی و نەوتی عێراق، ئەندامانی لیژنەکەیان ڕاپۆرتێکیان ئامادەکردوە و بڕیارە لە وەرزی نوێى یاسادانان پێشکەش بە سەرۆکایەتی پەرلەمانی بکەن.”

.

ئەو ئەندامەی لیژنەی دارایی وتیشی: “ئەندامانی لیژنەکانی دارایی و نەوت وگازی پەرلەمان، بە وەڵامەکانی وەزیری دارایی قایل نەبوون، شرۆڤەى وەزیری دارایی بۆ بڕگەی ژمارە 10ى بودجە زۆر جیاوازە، بەراورد بەشرۆڤەی ئەندامانی لیژنەکانی دارایی و نەوتی گازی پەرلەمان.”

.

هەروەها جەختی لەوەشکردەوە، “یاسای بودجە یەک پاکێجە و نابێت بە جیا مامەڵە لەگەڵ بڕگەکانیدا بکرێت، یاسای بودجە لە سەربنەمای ئەوە داڕێژراوە کە دەبێت هەموو داهاتەکان لە ناو بودجەدا خۆی بگرێتەوە هەر لەوێشەوە بڕیاری خەرج کردنی لە سەر بدرێت.”

.

بەوتەی ناجی ڕدەیس، لە ناو  پەرلەمانی عێراق کۆدەنگیەکی زۆرهەیە بۆ لێپرسینەوە لە وەزیری دارایی، ئەگەرێکی زۆریش هەیە وەزیری دارایی بۆ لێپرسینەوە بانگهێشتی پەرلەمان بکرێت.

.

“وەزیری نەوتی عێراق هیچ پەیوەندییەکی بەو پرسەوە نییە، تەنها وەزیری دارایی تێدا بەرپرسیارە، چونکە سەرپێچی یاسای بودجەی کردووە ،پارەی ڕەوانەی هەرێم کردووە بێ ئەوەی هەرێم نەوتەکەی ڕادەستی کۆمپانیای سۆمۆ بکات” ناجی ڕدەیس ئەندام پەرلەمانی عێراق وای وت.

.

ئەو ئەندامەی پەرلەمانی عێراق خۆازیاربوو، ئەو کێشەیە بە زووترین کات چارەسەر بکرێت، بە پێویستیشی زانی هەرسێ سەرۆکایەتیەکی عێراق، بە چڕوپڕی دانوستان لەگەڵ بەرپرسانی هەرێمی کوردستان لەسەر ئەو پرسە گفتوگۆ بکەن.

.

ڕۆژی چوارشەممە، 31ى تەمووز2019، کۆبوونەوەیەکی هاوبەش لە نێوان سەرۆکایەتی پەرلەمانی عێراق، ئەندامانی لیژنەی دارایی و نەوت و گازی، هەردوو وەزیری دارایی و نەوتی عێراق و سەرۆکی دەستەی چاودێری دارایی بەڕێوەچوو.

.

کۆبوونەوەکە تایبەت بوو بە دۆسیەی ناردنی بودجە بۆ هەرێمی کوردستان و ڕادەستنەکردنی نەوت بە بەغدا تێیدا بڕیاردرا ڕاپۆرتێک لەسەر وەڵامەکانی وەزیری دارایی ئامادە بکرێت و ڕادەستی سەرۆکایەتی پەرلەمان بکرێت.

وشە كلیلەكان:

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل