fbpx
Shadow Shadow

شەوێکى خوێناویی لە گەیارە؛ چۆن پێکدادان لە نێوان كەتیبەی ئیمام عەلی و پۆلیسدا ڕوویدا؟

14:51 شه‌ممه‌ 18 كانونی دووه‌م 2020
article image

ناس کورد-

 

شەوى ڕابردوو لەناحیەی گەیارەی سەر بەنەینەوا، دەمەقاڵێی نێوان پۆلیسی ناوخۆیی و هێزێكی كەتیبەی ئیمام عەلی سەر بەحەشدی شەعبی پێکدادانى لێکەوتەوە، بەهۆیەوە پۆلیسێك و مێردمنداڵێکى خوار 18 ساڵان برینداربوون.

 .

 .ساڵح جبوری بەڕێوەبەری ناحیەی گەیارە بەناس كوردی ڕاگەیاند، لەكاتی ئەركی شەوانەی تیمێكی پۆلیسی سەر بەپۆلیسی ناوخۆی  نەینەوا، دەمەقاڵێ لەنێوان ئەو تیمەی پۆلیس و چەكدارانی كەتائیبی ئیمام عەلی سەر بەحەشدی شەعبی لەو ناوچەیە دروستبووە بەوهۆیەوە پۆلیسێك كە لەناو ڕوداوەكەدا بووە بریندار بووە.

 .

لەسەر هۆكاری هەڵیگرسانی شەڕەكە جبوری دەڵێت “تا ئێستا هۆكارەكەی نەزانراوە، بەڵام بەوتەی شایەتحاڵەكان یەكێك لەپۆلیسەكان سەرەتا دەستی كردووە بەقسەكردن بەچەكدارەكانی حەشدی شەعبی، ئەمەش وای لەهەردوولا كردووە بەشداری ئەو دەمەقاڵێیە بكەن و پێكدادان ڕووبدات و بەو هۆیەشەوە پۆلسێیك بەگولەی حەشدی شەعبی بریندار بووە”.

 .

بەڕێوەبەری ناحیەی گەیارە ڕونیكردەوە، دوای ڕوداوەكە پۆلیس تەقەكەرەكەی دەستگیركردووە و بەمەبەستی ڕێوشوێنی یاسای لەدژی ڕایگرتووە، بۆ ئەوەی ئارامی بۆ ناوچەكە و گەیارەش بگەرێتەوە و زیاتر پەلنەكێشێ.

 .

لای خۆشیەوە، عەلی خزێر ئەندامی پێشووی  ئەنجومەنی  نەینەوا بەناس كوردی ڕاگەیاند، شەوى ڕابردوو چەكدارانی حەشدی شەعبی بەئۆتۆمبێلێكی جام ڕەشەوە هاتوونەتە ناو بازاڕی گەیارە لەنزیك مزگەوتی ڕەمانە و دەنگیان بەسەر پۆلیسەكاندا بەرزكردووەتەوە.

 .

وتیشی، یەكێك لەپۆلیسەكان لەئۆتۆمبیلەكەی دابەزیوە و بەرەو ئەو ئۆتۆمبیلە ڕۆیشتووە كەحەشدی شەعبی تێدابوو بۆ ئەوەی بینانناسێت و هۆكاری ئەو هێرش و دەنگ بەرزكردنەوە و جنێوە بزانێت، دوای ئەوەی دەمەقاڵێی دەكەوێتە نێوانیان، بەگولە لێیدەدەن و دەیپێكن و دەكەوێتە سەر زەوی.

 .

ئەو ئەندامەی پێشووی ئەنجومەنی شارەكە ئەوەشی ڕونكردەوە، دوای ئەو ڕوداوە مێردمنداڵێک كە تەمەنی ناگاتە 18 ساڵان و خەڵكی شارەكەیە بەرەو شوێنی ڕوداوەكە ڕایكردووە بۆ ئەوەی فریای پۆلیسە بریندارەكە بكەوێت، لەلایەن چەكدارانی حەشدەوە تەقە لەویش كراوە و گولە بەر قاچى کەوتووە و  ئەویش بریندار بووە.

 .

هاوکات سەرچاوەیەكی بەرپرس لەئیدارەكەی ناوچەكە بەناس كوردی ڕاگەیاند، نەجم جبوری پارێزگاری شارەكە هێزی بۆ فەوجی پۆلیسی فریاكەوتنی گەیارە ناردووە، هەروەها هێزیشی بۆ فەوجی فەرماندەی ئۆپەراسیۆنەكان ناردووە بۆ ئەوەی ڕوداوەكە تەشەنە نەكات و كۆنترۆڵ بكرێت.

 .

داوای دەركردنی حەشد لەموسڵ دەكرێت

بەهۆی بەشداریكردنی حەشدی شەعبی لەشەڕی دژی داعش لەئێستادا ئەو میلیشیا چەكدارانە لەو ناوچەیەدا جێگیر كراون، بەوتەی خزێر، نەبونی چاودێر و فرە بڕیارى لەحەشدی شەعبی بووەتە هۆی ئەوەی هاوڵاتیانی مەدەنی زیانمەند بن و چەند ڕوداوێكیش بكەوێتەوە كە كاریگەریی بۆ سەر ژیانی خەڵكی ناوچەكە هەبێت.

 .

خزێر دەشڵێت “پێویستە حەشدی شەعبی و سوپا لەشاری موسڵ و ناوەندی پارێزگای ئەنبار و سەرجەم قەزا و ناحیەكانی دەورووبەری بكرێنە دەرەوە و بەسەر ناوچە سنورییەكان و بیابانەكانی موسڵ دابەشبكرێن”.

 .

بەرپرسەكەی پێشووی ئەنجومەنی شارەكە ئەوەشی خستەڕوو “بەهۆی گەڕانەوەی دەركراوانەوە ئێستا ژمارەی هێزەكانی پۆلیس گەیشتونەتە 20 هەزار پۆلیس ئەوەش بۆ پاراستنی سنورى نەینەوا پێویستە”.

 .

خزێری باسی لەوەشكرد، موسڵ زۆر ئارامە، هەندێ لەچەكدارانی حەشد خراپە و توندوتیژیی لەگەڵ خەڵكدا دەكەن و دەڵێن ئەوانە داعشن، هیچ شتێك بەنای داعشەوە لەموسڵدا نەماوە و پۆلیسی ناوخۆ دۆخەكەی كۆنترۆڵ كردووە، بۆنمونە لەڕوداوی ئەمدواییەی گەیارەدا و گەر ئەو ڕوداوانەش بەردەوام بێت جارێكی تر پشێویی دەگەڕێتەوە.

وشە كلیلەكان:

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل