fbpx
Shadow Shadow

سێ مانگ تێپەڕى.. پارێزگارە کوردەکەى کەرکوک کەى دەستبەکاردەبێت؟[تایبەت]

21:43 شه‌ممه‌ 24 ئاب 2019
article image

ناس کورد- هەڤاڵ فەتاح

سێ مانگ بەسەر دیاریکردنى تەیب جەبار شاعیر و ئەندازیار بۆ وەرگرتنى پۆستى پارێزگارى کەرکوک تێدەپەڕێت و هێشتا دیار نییە کەى ئەو پارێزگارە کوردە لەسەر کورسى پارێزگاى کەرکوک دادەنیشێت و ئاوێک بە ئاگرى ئەو ناکۆکیە سیاسییەدا دەکات کە لە دواى 16ى ئۆکتۆبەرەوە بەرۆکى لایەنە سیاسیەکان و پێکهاتەکانى ئەو شارەى گرتۆتەوە.

.

ئەندامێکى ئەنجوومەنى پارێزگاى کەرکوک کە سەر بە یەکێتی نیشتیمانى کوردستانە رەتیدەکاتەوە لەبارەى دۆخى کەرکوکەوە هیچ جۆرە کۆبوونەوەیەکى نزیک لەئارادابێت و دەنگۆى کۆبوونەوە لەو بارەیەوە بە “ناڕاست” ناودەبات.

.

ئەحمەد عەسکەری، ئەندامی ئەنجومەنی پارێزگای کەرکوک، لە سەر لیستی یەکێتی، بە ناس کوردی ڕاگەیاند:”سەرەتا دەبێت پارتی ویەکێتی لە ناوخۆیاندا ڕێکبکەون، ئەگەر ناو ماڵی کورد رێکنەخرێتەوە چۆن کۆبوونەوە دەکرێت؟”.

.

عەسکەرى لیستى برایەتى و بەتایبەتى ئەندامەکانى پارتى دیموکراتى کوردستان بە هۆکارى سەرەکى دواکەوتنى کۆبوونەوەکە و ئاسایکردنەوەى دۆخى شارەکە زانى.

.

هەرچى لایەنە تورکمانەکانى ئەو شارەیە وەک خۆیان دەڵێن لەدواى دەستنیشانکردنى تەیب جەبار بە پارێزگارى کەرکوک لەلایەن دوو پارتە دەسەڵاتدارەکەى کوردەوە، لە چاوەڕوانى پارتى و یەکێتیدان بۆ گفتوگۆکردنى ئەو بابەتە.

.

نەجات حسێن، ئەندامی ئەنجومەنی پارێزگای کەرکوک لە پێکهاتەی تورکمان، بۆ ناس کوردى روونکردەوە “وەک تورکمان هیچ کێشەیەکمان نییە، ئامادەی کۆبوونەوەین، بەڵام ئەوان نایەنە پێشەوە”.

.

پارتى دیموکراتى کوردستان هەر لەسەر قسەکانى خۆى لە دواى رووداوەکانى 16ى ئۆکتۆبەرى 2017 ماوە و بە وتەى نەیارانى ئەو پارتە “قەوانە کۆنەکە” دەڵێنەوە و بەبیانووى داگیرکردنى شارەکە لەلایەن سوپاى عێراق و هێزە شیعەکانەوە، ئامادەى هیچ جۆرە کۆبوونەوەیەک نیین لەناو ئەو شارە.

.

عەدنان کەرکوکی، ئەندامی ئەنجومەنی سەرکردایەتی پارتی دیموکراتی کوردستان، بە ناس کوردى راگەیاند “کێشەی کەرکوک بە چەند کۆبوونەوەیەک چارەسەر ناکرێت، چونکە کێشەی کەرکوک سیاسیەو دەبێت بە ڕێککەوتنی سیاسی لە نێوان هەولێر و بەغدا  چارەسەر بکرێت”.

.

سەرکردایەتییەکەى پارتى تەنانەت دانانى پارێزگارێکى کورد بۆ شارەکە بە چارەسەرى بنەڕەتى کێشەکانى ئەو شارە نابینێت و پێداگرى لەسەر ئەوە دەکات دەبێت دۆخی ئەمنی شارەکە بگەڕێنرێتەوە بۆ پێش رووداوەکانى 16ى ئۆکتوبەر و وتى “چونکە ئێستا کەرکوک داگیرکراوە”.

.

بەوتەى عەدنان کەرکوکى  کێشەی کەرکوک لە کۆبوونەوەیەکی ئەنجومەندا بچوک ناکرێتەوە و  دانانی پارێزگارێکی کوردیش بۆ کەرکوک لەم دۆخەدا هیچ بەهایەکی نییە.

.

پێدەچێت چیتر کێشە و ململانێکانى پارتە دەسەڵاتدارەکەى کورد (پارتى و یەکێتى) لە بارەى کەرکوکەوە بۆ پێکهاتەکانى عەرەب و تورکمانى شارەکە شاراوە نەبێت، بە بەڵگەى ئەوەى چەند ئەندامێکی ئەنجومەنی پارێزگای کەرکوک لە پێکهاتەی عەرەب و تورکمان بە چەند میدیاییەکى عێراقییان ڕاگەیاند بوو “کورد سەرکەوتوو نەبووە لە ڕازیکردنی ئەوان بۆ ئەنجامدانی کۆبوونەوەی ئەنجومەنی پارێزگا لە دەرەوەی کەرکوک، بەهیچ شێوەیەکیش بەوە ڕازی نابن  و بەشداری هیچ کۆبوونەوەیەک ناکەن لە دەرەوەی کەرکوک”.

.

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل