fbpx
Shadow Shadow

سیاسه‌تی

سوپای سوریا شارۆچکەیەکی ستراتیژی لە ئیدلب کۆنتڕۆڵکرد.. 370 هاوڵاتی مەدەنیش کوژراون

15:42 هه‌ینی 07 شوبات 2020
article image

ناس کورد –

سوپای سوریا شارۆچکەی سەراقیبی لە نزیک ئیدلب کۆنتڕۆڵکرد کە ناوچەیەکی ستراتیژییە و “هەنگاوێکە” بۆ کۆنتڕۆڵکردنی تەواوی ئیدلب.

.

ئەمرۆ هەینی، 7ی شوباتی 2020، ئاژانسی هەواڵی سانای سەر بە حکومەتی سوریا ڕایگەیاند: “هێزەکانی سوپای سوریا چوونەتە ناو شارۆچکەی سەراقیب لە ئیدلب کە چەند ڕۆژێکە شەڕی قورس تێیدا بەردەوامە” لە نێوان سوپای ڕژێمی سوریا و چەکدارانی سەر بە ئۆپۆزسیۆنی چەکداریی سوریا کە تورکیا پشتیوانیان دەکات.

.

ئاژانسی سانا دەشڵێت، “سەربازانی سوپا چونەتە ناو شارۆچکەی سەراقیب و دەستیان بە پاککردنەوەی ناوچەکە لە مین و تەقەمەنی و پاشماوەی چەکدارەکان کردوە”.

.

هاوکات گێر بیدرسن، نوێنەری نەتەوە یەکگرتووەکان لە سوریا لە بارەگای نەتەوە یەکگرتووەکان ڕایگەیاند: “دۆخەکە پێویستی بە ئاگربەستی هەمیشەیی و بردنی هاوکاری مرۆیی بۆ ناوچەکە هەیە”.

.

هاوکات هەر ئەمرۆ، سوپای تورکیا خاڵیکی دیکەی چاودێری لە ئیدلب دروست کردوە، هەروەها سەدان زرێپۆش و تانک و چەکی قورسی بردووەتە ئیدلب و هەڕەشەی لە سوپای سوریا کردوە لەئەگەر هێرشکردنە سەر ئیدلبدا وەڵامی توندیان دەبێت بۆیان.

.

هەر ئەمڕۆش فه‌ریدون سینیرلی ئۆغلۆ، نوێنه‌ری توركیا له‌ نه‌ته‌وه‌ یه‌كگرتووه‌كان هۆشداری دایه‌ دیمه‌شق و ڕایگه‌یاند: “توركیا به‌رگری له‌ ئاسایشی سه‌ربازه‌كانی له‌ سنوری پارێزگای ئیدلب ده‌كات هەروەها به‌ هه‌ماهه‌نگی له‌گه‌ڵ ڕوسیا، هێزه‌كانی توركیا ڕه‌وانه‌ی ئیدلب كراون”.

.

لەوەڵامیشدا هێڵی كرافت، نوێنەری هەمیشەیی ویلایەتە یەكگرتوەكانی ئەمریكا لە نەتەوە وتی، “ویلایەتە یەكگرتووەكان بە تەواوی پشتیوانی لە توركیا دەكات كە هاوپەیمانی ناتۆیە و مافی خۆیەتی بەرگری لە خۆی بكات دژ بە هێرشە بێبنەماكانی ڕژێمی ئەسەد”.

.

هێڵی كرافت ئاماژەی بەوەشكرد، “هێزەکانی ڕژێمی ئەسەد بە ناڕەوایی هێرشدەكەنە سەر خاڵەكانی چاودێری توركیا لە پارێزگای ئیدلیبی باكوری سوریا و تا ئێستا دوو سەربازی توركیان لەو ناوچانەدا كوشتوە”.

.

ئەمەش لەکاتێکدایە کە هەر ئەمڕۆ نەتەوە یەکگرتووەکان ڕایگەیاند: “بەهۆی شەڕ و هێرشەکانەوە لە ئیدلب تەنها لە دوو مانگی ڕابردودا زیاتر لە 370 هاوڵاتی مەدەنی کوژراون هەروەها دەیان هەزار هاوڵاتیش ئاوارەبوون”.

وشە كلیلەكان:

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل