Shadow Shadow

سه‌ركردایه‌تییه‌كی یەکێتی: یان پارێزگارێکی یەکێتی یان بەشداری حکومەت ناکەین

23:11 شه‌ممه‌ 29 حوزه‌یران 2019
article image

ناس کورد- شەهرام عەزیز

 

یەکێتی نیشتیمانی کوردستان چاوەڕێی پارتی دەکات بۆ چوونە پێشەوە و ڕێککەوتن لەسەر پۆستی پارێزگاری کەرکوک، ئه‌ندامێكی سه‌ركردایه‌تی یه‌كێتیش دەڵێت:”پارێزگاری كه‌ركوك یەکێتی بۆ یه‌كێتی نه‌بێت بەشداری حکومەتی نوێی هه‌رێم ناکەین”.

.

سامان گەرمیانی، ئەندامی سەرکردایەتی یەکێتی بە ناس کوردی ڕاگەیاند: “تاڕادەیەک نزیکبوونەوەیەک لەنێوان پارتی و یەکێتیدا دروستبووە و لەئێستادا چاوەڕوانی پارتین بۆ ئەوەی بێنە پێشەوە و لەسەر پۆستی پارێزگاری کەرکوک ڕێکبکەوین”.

.

سەبارەت بەوەی پارتی دەیەوێت کەسێکی بێلایەن بکرێتە پارێزگاری کەرکوک، ئەو ئەندامەی سەرکردایەتی یەکێتی ئاماژەی بەوەکرد:” یان پارێزگارێکی یەکێتی بۆ کەرکوک دادەنرێت، یان بەشداری حکومەت ناکەین و بەشداری نەکردنی یەکێتیش لە حکومەتدا، واتە ئەو حکومەتە لاسەنگ دەبێت”.

.

جەختیشیکردەوە، چۆن پارتی بەبێ گەڕانەوە بۆ هیچ حزبێک پۆستی جێگری پارێزگاری موسڵی وەرگرت، ئاوهاوش ئەوان کە شەش کورسیان لە کەرکوک هەیە پۆستی پارێزگاری ئەو شارە بە مافی خۆیان دەزانن و پۆستی پارێزگاری کەرکوک مافی ئەوانە.

.

ئەمە لەکاتێکدایە، هەفتەی ڕابردووش عەدنان کەرکوکی، ئەندامی سەرکردایەتی پارتی بە ناس کوردی ڕاگەیاندبوو، بەهیچ کاندیدێکی یەکێتی ڕازی نابن و ئەو کەسەی دەبێتە پارێزگاری کەرکوک دەبێت کەسێکی بێلایەن بێت.

.

هاوکات سەبارەت بە سەردانەکانی نێچیرڤان بارزانی، سەرۆکی هەرێم بۆ دەرەوە بەبێ بەرپرسانی یەکێتی، سامان گەرمیانی ڕوونیکردەوە، یەکێتی تائێستا بڕیاری بەشداری لە هیچ جومگەیەکی حوکمڕانیدا نەداوە بە سەرۆکایەتی هەرێمیشەوە، هەروەها لە ڕابردووشدا کە یەکێتی بەشداریش بوو، مەسعود بارزانی و نێچیرڤان بارزانی هەر بەبێ یەکێتی زۆرینەی کاتەکان سەردانی دەرەوەیان کردووە و پەیوەندییە نێودەوڵەتییەکانیان بەستووە.

.

ئەو بەرپرسەی یەکێتی روونیكرده‌وه‌، لەسەرەتای گفتوگۆکانەوە بۆ پیکهێنانی حکومەت باسی شەراکەتی ڕاستەقینەیان کردووە و ئەگەر بەشداربن لە حکومەت، ئەوا ڕازی نابن بەبێ یەکێتی هیچ ڕێککەوتنێک لەگەڵ دەرەوەدا بکرێت، یاخود وەلا بنرێن وەک ساڵانی ڕابردوو.

.

زیاتر لە نۆ مانگە هەڵبژاردنی پەرلەمانی کوردستان ئەنجامدراوە و تائێستا یەکێتی و پارتی کە دوو پێکهێنەری سەرەکی حکومەتی هەرێمن نەگەیشتوونەتە ڕێککەوتنی کۆتایی بۆ پێکهێنانی حکومەتی نوی و کێشەی پارێزگاری کەرکوک بووەتە به‌ربه‌ست لەنێوان هەردوولادا و بەهۆیەوە کابینەی نۆیەمی حکومەت پێکنەهێنراوە.

.

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل