fbpx
Shadow Shadow

سیاسه‌تی

حکومەتەکەى عەلاوى بەرەو کوێ؟ .. لەژورە داخراوەکاندا چى رودەدات؟

22:38 پێنج شه‌ممه‌ 13 شوبات 2020
article image

ناس کورد-

وا دەردەکەوێت دەرفەتى محەمەد تۆفیق عەلاوى بۆ پێکهێنانى کابینەکەى بەهەمان هێندەى ئەگەرەکانى شکستهێنانى بێت، تائێستاش هیواو روناکیەک لە هەوڵەکانى بەدی ناکرێت، ژورى دانوستانەکان کە هادى محەمەد تۆفیق عەلاوى کوڕى بەڕێوەى دەبات ئەرکى زۆر قورسە بەتایبەتى کە بەشێکى کوتلە سیاسیەکان دەستیان گرتوە بە پشکى خۆیانەوە لە کێکەکەو ئامادەنین دەستبەردارى ببن.

،
،

لەبارەى دانوستانەکانەوە سەرچاوەیەکى ئاگادار بە “ناس” وت، هادى محەمەد عەلاوى بەنوێنەرایەتى باوکى دانوستانەکان دەبات بەڕێوەو گفتوگۆکانى تایبەت بە 10 وەزارەت تەواو کردوەو چەندین ناو دیاریکراون بۆ هەر وەزارەتێک و لەکاتى پێشکەشکردنى حکومەتەکەى کاندیدى ئەو وەزارەتانە ئامادە دەبن، بۆ نمونەش بۆ وەزارەتى وەرزش  سێ ناو ئامادەن ئەوانیش “حسێن سەعید، عەدنان دەرجال و ئەحمە ڕازى”ن.

،

بەگوێرەی میدیا عێراقییەکان، کاروانى هێزە سیاسیەکان بەدەورى نوسینگەکەى عەلاویدا دەسوڕێنەوە ئەوەش لەدواى چەند کاتژمێرێک لەراسپاردنى بۆ پێکهێنانى حکومەتەوە دەستى پێکردوە، بۆیە هادى محەمەد عەلاوى پەناى بۆ هاوڕێیەکى بەناوى “سەفوان” بردوە بۆ ئەوەى نوسینگەکەى باوکى لە ناوچەى سەوز ببات بەڕێوە، ئەو کەسەش چاوى بە وەفدى زۆرینەى کوتلە سیاسیەکان کەوتوە.

،

لەلایەکى ترەوە تائێستاش هەندێک کوتلەى سیاسى بەچاوى گومانەوە سەیرى عەلاوى و حکومەتە چاوەڕوان کراوەکەى دەکەن، حزبە کوردى و سونیەکان ترسیان لە دەستبەرداربونى حکومەت هەیە، سیناریۆکەى عەلاوى بۆ پێکهێنانى حکومەتێکى تەکنۆکرات و سەربەخۆ رەتدەکەنەوەو ئەوەش لە لێدوانى پەرلەمانتار و سەرکردە  کوردى و سونیەکاندا دەردەکەوێت، ئەو کوتلانە پێیان وایە حکومەتەکەى عادل عەبدولمەهدى بەهۆى خۆپیشاندانەکان و کێشەى”شیعى – شیعى”یەوە ڕوخا و هیچ پەیوەندیەکى بەوانەوە نییە، تەنانەت ئەگەر حزبە شیعیەکانیش لە پشکى خۆیان لە حکومەت خۆش بوون ئەوا بەلاى ئەوانەوە هیچ ناگەیەنێت.

،

هەر تایبەت بەوە سەرچاوەیەکى ئاگادار بە “ناس”ى وت، هێز و حزبە سونیەکان دەیانەوێت لەماڵى مەحمود مەشهەدانى کۆبونەوەیەک بکەن و تێیدا جوڵەکانى محەمەد تۆفیق عەلاوى  و پەراوێزخستیان لە حکومەتى نوێدا رەتبکەنەوە.

،

لە هەندێک لە میدیا عەرەبییەکاندا ئاماژە بەوەشکراوە، هەڵوێستى عەلاوى ماڵى سونەکانى گەرم کردوەو گرژیەکانى نێوان محەمەد حەلبوسى سەرۆکى پەرلەمان و ئوسامە نوجێفى سەرۆکى بەرەى رزگارى و گەشەپێدانى زیاتر کردوە، چونکە نوجەیفى پشتگیرى هەنگاوەکانى عەلاوى دەکات، بەڵام حەلبوسى کە سەرۆکى کوتلەیەکى گەورەى پەرلەمانە دەیانەوێت لە حکومەتدا بەشدارى بکەن.

،

هەرچى سەبارەت بە ماڵى شیعیشە، تائێستاش موقتەدا سەدر رابەرى رەوتى سەدر سورە لەسەر هەڵویستى خۆى سەبارەت بە حکومەتەکەى عەلاوى هەرچەند هەڕەشەى ئەوەشى کردوە کە دەنگ بە حکومەتەکە نادەن، هەرچى حەیدەر عەبادى سەرۆکى ئیئتلافى “نەسر”یشە لەیەکێک لە کۆبونەوەکاندا وتویەتى: “دەنگ بە حکومەتەکەى عەلاوى دەدەن وەک حزبى دەعوە، بەڵام ئەگەر کورد و سونە بایکۆتیان کرد ئەوا ئەوانیش دەیکەن”.

،

رۆژى پێنج شەممە کوتلەى “بیارق الخیر” ئاشکرایکرد، حکومەتەکەى محەمەد تۆفیق عەلاوى تەواو بوە و محەمەد خالیدى سەرۆکى کوتلەکە وتى، کابینەکە ئامادەیەو رۆژى یەکشەممەى داهاتوو رادەگەیەنرێت و عەلاوى، سەرۆککۆمار و سەرۆک وەزیرانى دەستلەکارکێشاوە ئاگادار دەکاتەوەو داواش لەپەرلەمان دەکات کۆبونەوەیەکى بەپەلە بکات بۆ دەنگدان بە کابینەکەى.

،

ئەوەشى رونکردبوەوە، لەلایەن هەندێک لە کوتلە سیاسیەکانەوە پەستان دروستکراوە، بەڵام کاریگەرى لەسەر تێپەڕاندنى کابینەکە ناکات لە پەرلەمان.

،

رۆژى 1ی شوباتی 2020، بەرهەم ساڵح، سەرۆککۆماری عێراق، محەمەد تۆفیق عەلاوى راسپارد بۆ پێکهێنانى کابینەى نوێى حکومەت، عەلاویش دەیەویت کابینەیەکى سەربەخۆ و تەکنۆکرات پێکبهێنێت کە سەرجەم ڕەنگەکانى تێدا بێت و دور لە پاڵێوراوانى حزبى و بەرنامەکەشى بەرەنگاربونەوەى گەندەڵى و دابینکردنى هەلى کارەو ژمارەیەکى زۆر بەڵێنى داوە، بەڵام لە عێراقێکى پڕ لە کێشمەکێشى سیاسى و تەنگژە و گەندەڵى و فرە حزبى و میلیشیا و دەستى دەرەکى، ئەرکەکەى عەلاوى ئاسان نابێت.

وشە كلیلەكان:

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل