Shadow Shadow

حكومەتی هەرێم 800 ملیۆن دۆلار قەرزاری بەڵێندەرانە

21:40 شه‌ممه‌ 25 ئایار 2019
article image

ناس كورد-وریا حسێن
سەرباری دانەوەی دوو قیستی بەڵێندەران، هێشتا حكومەتی هەرێمی كوردستان 800 ملیۆن دۆلار قەرزاری بەڵێندەرانە، ئەوەش وایكردووە دەسپێكردنەوەی پڕۆژەكان بەشێوەیەكی بەرچاو نەبێت.

.
سەرۆ دزەیی سەرۆكی یەكێتی بەڵێندەرانی كوردستان لقی هەولێر لەبارەی دۆخی پڕۆژەكانی بەڵێندەرانەوە ئەوەی بۆ ناس كورد ڕوونكردەوە، سێ هەزار پڕۆژەی بەڵێندەران بەر قەیرانی دارایی كەوتن و وەستان پاش ئەوەی حكومەت بەڵێندەرانی سەرپشككرد لەوەستاندنی پرۆژەكان.

.

 

“سێ هەزار پڕۆژەی بەڵێندەران بەر قەیرانی دارایی كەوتن و وەستان پاش ئەوەی حكومەت بەڵێندەرانی سەرپشككرد لەوەستاندنی پرۆژەكان”

 

وتیشی “مانگی یانزەی ئەمساڵ حكومەتی هەرێم 100 ملیۆن دۆلاری بۆ خەرجكردین، ئێستا 100 ملیۆنی دیكەش دراوە بە بەڵێندەران و سەرقاڵی دابەشكردنی پارەكەین، 80 ملیۆنی دابەشكراوە و 20ی ماوە بەهۆی كێشە لەنێوان وەزارەتی دارایی و سامانە سروشتیەكان هێشتا دابین نەكراوە”.

.
بەگوێرەی ئاماری یەكێتی بەڵێندەرانی كوردستان حكومەتی هەرێم سەرو یەك ملیار و 400 ملیۆن دۆلار قەرزاری بەڵێندەران بووە، بەڵام دوای پێدانەوەی چوار قیستی پارە ئاستی قەرزەكە بۆ 800 ملیۆن دۆلار دابەزیووە كە دەكاتە ڕێژەی 50%ی كۆی قەرزەكە”.

.

سەرۆكی یەكێتی بەڵێندەرانی كوردستان لقی هەولێر ئاماژە بۆ ئەوە دەكات ئێستا كێشەیەك هەیە كە ئێمە و بەڵێندەرانیشی دوودڵ كردووە لەبارەی دەستپێكردنەوەی پڕۆژەكان وتیشی: “بۆ دەستپێكردنەوەی پڕۆژەكان پێویستە قەرزی بەڵێندەرەكان بدرێتەوە ئەگەر هەمووشی نەبێت، وە پارە دابنرێت بۆ ئەو بەڵێندەرەی كار دەكات، لەو بارەیەوە یاداشتنامەیەكمان بۆ وەزارەتی دارایی و ئەنجومەنی وەزیران نوسیووە”.

.

وتیشی: “پێویستە ئەنجومەنی وەزیران لەگەڵ ئێمە تەنسیق بكات بۆ دەستپێكردنەوەی پڕۆژەكان، پاش ئەوەی گرنگترین پڕۆژەكانمان دیاریكرد”.

.

“بۆ دەستپێكردنەوەی پڕۆژەكان پێویستە قەرزی بەڵێندەرەكان بدرێتەوە ئەگەر هەمووشی نەبێت”

.
سەرباری نادڵنیایی، بەڵام بەگوێرەی وتەی بەڵێندەران “ئەو قەرزەی حكومەت بە بەڵێندەرانی داوەتەوە بەشێك لە پرۆژەكان دەستیان پێكردووەتەوە، ئومێدی گەورەش لەسەر كابینەی داهاتوو هەڵچنراوە كە بڕیارە دوای جەژنی ڕەمەزان پێكبهێنرێت”.

.

پیشەوا عومەر بەڵێندەر لەشاری سلێمانی ئاماژە بۆ ئەوە دەكات ئەو 200 ملیۆن دۆلارەی وەرگیراوەتەوە گەرموگوڕییەكی باشی داوەتەوە بە بەڵێندەران و پڕۆژەكان، بەناس كورد-ی وت: “سلێمانی زۆرترین پڕۆژەی بچوك تێیدا دەستیپێكردووەتەوە، دەستپێكردنەوەكەش بەجۆرێكە گەیشتووەتە ئاستی 50%”.

.
ئەو بەڵێندەرە ئاماژە بۆ ئەوە دەكات ئێستا دۆخەكە باشترە لەجاران ئەو پڕۆژانەی كە پێشتر 75% یان تەواوكرابوون ئێستا دەستیان پێكردووەتەوە تەنانەت تا ئاستی 50%یش ڕێژەكە هاتووە وتیشی: “نرخی چەكی بەڵێندەران لەهەرێمی كوردستان بەرزتر بووەتەوە”.

.

“سلێمانی زۆرترین پڕۆژەی بچوك تێیدا دەستیپێكردووەتەوە، دەستپێكردنەوەكەش بەجۆرێكە گەیشتووەتە ئاستی 50%” 

.

هاوكات میران كامیل وتەبێژی یەكێتی بەڵێندەرانی كوردستان لقی سلێمانی نەیشاردەوە دۆخە بۆ بەڵێندەران ناڕونی تێدایە نازانن دوای پێدانەوەی ئەو دوو بڕە قەرزە بە بەڵێندەران بەشێوەی “سولفەی بەردەوام” بەردەوامی دەبێت یان نا، وتی “نازانین دۆخەكە بەچی دەگات، چاوەڕێی حكومەتی داهاتووی هەرێمین بۆ ئەوەی بزانین ڕوانگەی چییە لەبارەی قەرز و دەستپێكردنەوەی پڕۆژەی بەڵێندەران”.

.

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل