fbpx
Shadow Shadow

"ساڵى ڕابردوو تەنها لە هەڵەبجە 35 ملیۆن کیلۆگرام هەنار بەرهەم هاتوە"

جوتیارانی هەڵەبجە خاوەنی هەزاران تۆن هەنارن و ئامادەن هەناردەی وڵاتانی جیهانی بکەن

20:25 دوو شه‌ممه‌ 21 تشرینی یه‌كه‌م 2019
article image

ناس کورد- هۆرڤان ڕەفعەت

هەرێمی کوردستان توانای هەناردەکردنی هەناری هەیە بۆ عێراق و دەرەوەی وڵات، جوتیارانیش داوای هاوکاری لە حکومەتی هەرێم دەکەن بۆ یارمەتیدانیان لە هەناردەکردنی هەنارى هەرێمى کوردستان بۆ دەرەوەی وڵات.

,

لە ڕوى زەوى کشتوکاڵەوە هەرێمی کوردستان یەکێکە لەو وڵاتانەی کە خاوەنی زەوییەکی فراوان و بەهێزە و بەهۆی بەپیتی خاکەکەیشیەوە ساڵانە چەندین بەرهەمی جیاواز و جۆراوجۆری هەیە، هەروەها بەشێک لە بەرهەمەکانیشی هێندە زۆرن دەتواندرێت هەناردەی وڵاتانی جیهان بکرێت، یەکێک لەو بەرهەمانەش هەنارە.

,

ئازاد کوردستانی، ناسراو بە جوتیارە نمونەییەکەی هەڵەبجە بە ناس کوردی ڕاگەیاند: “ئێمە لە هەڵەبجە بەرهەمێکی زۆری هەنارمان هەیە و من بەس خۆم ئەمساڵ 500 تۆن هەنارم هەیە، لەئێستادا لە ساردکەرەوەدا دامناون بۆ ئەوەی تێک نەچن و دەتوانین بینێرینە دەرەوەی هەرێمی کوردستان وعێراق”.

,

جوتیارە نمونەییەکە ئاماژەی بەوەشکرد: “دەمانەوێت حکومەتی هەرێمی کوردستان هاوکارمان بێت لە هەناردەکردنی ئەو هەنارە بۆ دەرەوەی کوردستان، بەڵام تا ئێستا کارئاسانیمان بۆ نەکراوە”.

 

 

جوتیارانی هەڵەبجە خاوەنی هەزاران تۆن هەنارن و ئامادەن هەناردەی وڵاتانی جیهانی بکەن

,

لەبارەى ئەوەى تاچەند ڕێگرى لە هاوردەکردنى هەنار کراوە؟، ئازاد کوردستانى وتى: “حکومەتی هەرێم بڕیاری ئەوەی دەرکردووە کە لە وەرزی پێگەیشتنی هەناردا، هاوردەکردنی ئەو بەرهەمە بۆ هەرێمی کوردستان ڕابگیرێت، بەڵام هەندێک کەس لەئێستادا فێڵ دەکەن و لەژێر باری میوەی دیکەوە هەنار دەهێننەوە ناو عەلوەکانی سلێمانی و هەولێر و دهۆک، بەوەش زەرەرێکی زۆر لە بەرهەمی ناوخۆیی دەدەن”.

,

لەوبارەیەوە حسێن محەمەد، وتەبیژی وەزارەتی کشتوکاڵ بە ناس کوردی وت: “ئەمڕۆ بەدواداچونمان کردووە بۆ ئەو بابەتە و بۆمان دەرکەوتوە، چەند بازرگانێک ئەو فێڵە دەکەن و بەوەش زیانێکی زۆر لە بەرهەمی ناوخۆیی دەدەن ئەوەش جێگای نیگەرانی ئێمەیە و بەتوندی دژی وەستاوینەتەوە و لێپێچینەوە لە هەموو ئەو کەسانە دەکەین کە ئەو کارە دەکەن”.

,

حسێن محەمەد لەبارەى زۆری بەرهەمی هەنار وتی: “هەرێمی کوردستان لە وەرزە جیاوازەکاندا پێویستی بە هەناردە و هاوردەی هەنار هەیە، واتە لە هەندێک وەرزدا هەرێم بەهۆی پێنەگیشتنی هەناری خۆیەوە پێویستی بەوەیە کە هەنا هاوردە بکات لە وڵاتانەوە، هەروەها لە وەرزی پێگەیشتنی هەناریشدا هەرێم هێندە هەناری دەبێت کە بڕەکەی هێندە زۆر دەبێت کە بەتەواوەتی پێویستی ناوخۆیی پڕ دەکاتەوە و تەنانەت بەشی ئەوەشی دەبێت کە هەناردەی دەرەوەی هەرێمی بکات و جەند جوتیارێکیش داوای ئەوەیان لێکردووین”.

,

جوتیارە نمونەییەکەی هەڵەبجە ئەوەشى خستەڕو، ئەوان بەرهەمێکی زۆری هەناریان هەیە، هەروەها ئەو بەرهەمی هەنارەی هەڵەبجە هەیەتی وەک باسیلێوەکرد، باشترین هەنارە لەسەر ئاستی جیهان، وتیشی: “من لەساڵی ڕابردوودا هەناری باخەکەی خۆمم ناردووە بۆ بەریتانیا بۆ بەشداریکردن لە پێشبڕکێیەکی هەناردا و بەخۆشحاڵییەوە لە نێو هەنارى 89 وڵاتدا پلەی یەکەمم بەدەستهێنا و هەنارەکەم بە باشترین هەنار هەڵبژێردرا”.

 

جوتیارانی هەڵەبجە خاوەنی هەزاران تۆن هەنارن و ئامادەن هەناردەی وڵاتانی جیهانی بکەن

,

جوتیاران نایشارنەوە کە زۆرجار بەهۆى ئەوەى ڕێگری نەکراوە لە هاوردەکردنی هەناری دەرەکی بەتەواوەتی ڕێگای بە بازاڕکردنی هەناری نێوخۆییان نییە و کارئاسانییان بۆ نەکراوە بۆ ناردنە دەرەوەی هەنارەکانیان، زیانێکى زۆریان پێگەیشتوە و هەنارەکانیان بە نرخێکى زۆر کەم دەفرۆشنەوە.

,

لەلایەکى ترەوە فەرەیدون نامدار، کە خاوەنی کۆمەڵێک ساردکەرەوەی تایبەتە بە پاریزگاری لە بەرهەمی هەنار و بەرهەمی میوە، بە ناس کوردی ڕاگەیاند: “لە ئێستادا لە ساردکەرەوەکانی ئێمەدا نزیکەی 300 تۆن هەنار هەیە و ئامادەشین ئەو هەنارە بنێرینە وڵاتانی دەرەوە و عێراق”.

,

نامدار ئاماژەی بەوەشکرد: “ساڵى ڕابردوو تەنها لە هەڵەبجەدا 35 ملیۆن کیلۆگرام هەنار بەرهەم هاتوە، بەڵام کێشەی ئێمە ئەوەیە کە حکومەتی هەریمی تا ئێستا ئاسانکاری بۆ نەکردووین تا بەرهەمی ناوخۆیی بنێرینە وڵاتان”.

 

جوتیارانی هەڵەبجە خاوەنی هەزاران تۆن هەنارن و ئامادەن هەناردەی وڵاتانی جیهانی بکەن

,

ئەو بازرگانە ئەوەشى ئاشکراکرد: “ئەگەر بمانەوێت یەک تۆن هەنار لەڕێگای فڕۆکەخانەی نێودەوڵەتییەوە بنێرینە دەرەوەی عێراق ئەوا پێویستە هەزار و 200 دۆلار بدەین، لەکاتێکدا لە وڵاتی ئێرانەوە بە 80 دۆلار و لە وڵاتی قەتەرەوە بە 200 دۆلار بۆمان دەنێرنە هەر وڵاتێک کە ئێمە بمانەوێت، پێویستە حکومەتی هەریم ئاسانکاریمان بۆ بکات”.

,

داواشى لە حکومەتی هەرێم کرد، ئاسانکارییان بۆ بکات بۆ ئەوەی ئەو بەرهەمە بە جیهاندا بڵاوبکەنەوە، وتیشی: “چۆن ئێمە بەرهەمی وڵاتانی جیهان دەناسین، بەهەمان شێوەیەش خەڵکی بەرهەمی کوردستان بناسێت و بکڕێت بەوەش داهاتێکی زۆر بۆ هەرێم دەهێنێتە ناوەوە”.

,

لەبارەى داواى ئاسانکارى بۆ هەناردەى هەنار بۆ دەرەوەى وڵات، وتەبێژی وەزارەتی کشتوکاڵ جەختی لەوە کردەوە: “ئەگەر بێت و کۆمەڵێک جوتیار بەشێوەیەکی فەرمی داوامان لێبکەن کە ئامادەن بەرهەمەکانیان هەناردەی دەرەوەی وڵات بکەن و تەنها قسە نەبێت، ئێمەش وەکو وەزارەت کارئاسانیان بۆ دەکەین و یارمەتیان دەدەین”.

,

 

,

وشە كلیلەكان:

جۆری بابەتی دڵخوازت لەم ماڵپەڕەدا چییە؟

Loading ... Loading ...

جۆری بابەتی دڵخوازت لەم ماڵپەڕەدا چییە؟

Loading ... Loading ...
Do NOT follow this link or you will be banned from the site!
عاجل عاجل