fbpx
Shadow Shadow

"4 جوزيات على الدشبول"

سائق يلخص قانون غرامات المرور الجديد بـ “الدّارجة العراقية”: ضحك وحذر!

20:02 الإثنين 23 سبتمبر 2019
article image

بغداد – ناس

يترقب الشارع العراقي، وتحديدا سائقو السيارات في مختلف المحافظات، موعد تطبيق قانون المرور الجديد، والمليء بالغرامات، والذي من المفترض أن يبدأ تطبيقه مطلع تشرين الأول المقبل.

nasne

إقرأ المزيد: قانون المرور الجديد: حبس وغرامات.

nasne

وكتب احد السائقين في احدى اكبر المجموعات التي تضم اصحاب السيارات والتي تحمل اسم “ازدحامات بغداد”، منشوراً تابعه “ناس” اليوم (23 ايلول 2019)، لخص فيه فقرات المخالفات والغرامات التي تقابلها في قانون المرور الجديد، بطريقة فكاهية، فيما تجدر الاشارة الى استخدامه مفردة “بلبل جوزي”، إشارة الى ورقة العملة فئة الخمسين ألف دينار”.

 

نص المنشور:

“أكيد اكثركم ممتابع سالفة الغرامات الجديده الي راح تطبق يوم ٦/١٠/٢٠١٩

واكيد الاكثريه ديدخلون لشوارع ويلوفون من استدارات ممنوع يستدارون منها وهمه اصلا ميدرون

ويطبكون باماكن ممنوع الوقوف او التوقف بيها وهمه ميدرون اصلا

 

راح اكتبلكم الغرامات بلكت تبقه باذهانكم

WWW.NASNEWS.COM

١-جماعة ال ٢٥٠٠٠ دينار

أ.اذا عبرت مو من المكان المخصص للعبور غرامة

WWW.NASNEWS.COM

٢-جماعة ال٥٠.٠٠٠ دينار

أ.صفارة الانذار او الهورن مال لمبي لو هورن صوت حيوانات لو مكبرات صوت ومشغل المعزوفه لو عندك كيا بنكو ومصعد بالبدي سماعات مال اعراس ومشغل مرتضى حرب حلو بيارغهم وصدگيه صحبتهم

ب.اذا چفتت من اليمنه وما احسك اله بحضني هم عليها ٥٠ كالورد

جـ.اذا راسم على الجامه الخلفيه او الاماميه او مخلي لزكات عليها , شيلهن لان ٥٠ كالبطل وانت واكف

حـ. سيارتكم صالون تتحمل ٥ راكب تمام؟ اذا شلت بيها اكثر تدفع ٥٠ وبعدين تلمهن على الف الف من الراكبين وياك , او اذا جماعتك ملطلطين ومطلعين روسهم مثل الهايسكي من الجامات

د.اذا عندك دراجه محركها ٤٠ سي سي ميصير تطلع بيها بالشوارع الرئيسيه, ضل فرفر بيها بالافرع

ذ.اذا اجازتك منتهيه ٥٠ الف وانت واكف

ز.العلامات المروريه الي عالرصيف والي بالكاع مرسومه , اذا خالفتها ٥٠ الف, مع العلم اكو ناس متدري اكو علامات مروريه بالكاع مرسومه

هـ. من تلوف شغل اشاره يمنه او يسرى حتى متدفع ٥٠ عالريگ

ق.اذا حركت بدون متباوع وراك بصفك اكو سيارات لو لا هم ٥٠

ف.عندك تركتر لو شفل لو حادله ممنوع تأخذ السايد الايسر لا يحدلوك بيها

ث.عندك عرس وبالزفه كطعت الشارع ٥٠ الف والعروسه تدفعهن على شرط (ممنوع تقطع الشارع لاي سبب كان)

ص. اذا حضرتك تشمر زبل من السياره, خلي بصفك ٥٠

ض. اذا عندك كوستر ومقبطه وصعدت ناس وضلوا واكفين بالباب هم ٥٠

ط. نرجع لنفس الشخص الي عنده جماعه ملطلطين بس هالمره باع سيارته الصالون واشتره كوستر ورجعوا نفس الجماعه الملطلطين طلعوا روسهم مثل الشواذي من الجامات كذلك ٥٠ ويلمها من العبريه

ظ. نفس أبو الكوستر الي عنده جماعه ملطلطين بس هالمره مصاعدين ويا , لازم يشغل اضويه السياره الداخليه بالليل

م. أبو الكوستر عيني ممنوع تحجي ويه الركاب او تخلي احد يوكف يمك وانت تسوق

ن. أبو الكيا والكوستر عيني من ياشرلك عبري مو تشمر زروك يعني مو باي مكان تطبك لان تذب يوميتك كالبطل

ي.ابو الكيا والكوستر اذا سيارتك ممقبطه واكو عبري اشرلك ومركبته هم عليها ٥٠ مع العلم العبري راح يدفعلك كروتك بس انت متريد تركبه , مخالفه ام ال٥٠ بلبل

ر.هم أبو الكوستر والكيا لازم تلزك ورقه ليكدام تكتب بيها سيارتك كم نفتر تتحمل

ز.اذا مشايل اجازه او سنويه او ما انطيتها لرجل المرور , ٥٠.٠٠٠ دينار

و. عدم إعطاء الاسبقية للمشاة اذا نزلوا من الرصيف

ك.اذا انت ملابس حزام او الي بصفك ملابس حزام تدفع ٥٠

ؤ.اطفال عمرهم اقل من ٩ سنوات ميصير تكعدهم ليكدام

WWW.NASNEWS.COM

3-جماعة الـ ١٠٠.٠٠٠ دينار , بلبلين جوزيات (دخلنة بالغميج)

أ.دتسوق وجنان كل ساع داكه عليك ومجاوبها ولكفك أبو غضنفر , بلبلين جوزيات

ب. رقم سيارتك مواضح روح خطه وإذ متعاجز جيبلك صبغ اضافر لون حلو يرهم ويه الدعاميه

ت. اذا تلوف من استداره مو الك واكو قطعه قبل الاستداره ادكلك ممنوع تلوف منا , مثلا الاستداره الي بعد فندق الشيراتون ٩٠٪ من الناس يدرون ممنوع يلوف منها لان هيه للسايد الي جاي من باب الشرجي-كراده داخل

ث. اذا انت بشارع فرعي وطلعت للشارع العام الرئيسي , لازم تنزل سرعتك للصفر وتباوع منا ومنا يله تحرك

ج. اذا وكفت بالتقاطع بجهة اليمين وسديت الطريق على الي يريد يروح عاليمنه

ح. سيارتك مابيها شروط متانه وامان , ١٠٠.٠٠٠ دينار

WWW.NASNEWS.COM

4 -الحجي الثكيل جماعة الـ ٢٠٠.٠٠٠ دينار ٤بلابل جوزيات

أ.اذا كسرت الاشاره الضوئيه او إشارة رجل المرور تشمر ٤ بلابل عالدشبول

ب.تذكرون أبو الصالون الي باعها واشتره كوستر؟ قبل ليبيعها جان مصعد جماعته الملطلطين ومشغل (مخابيل ذوله ويامن اندكوا؟) وكام يفحط لو طاير بنص السيارات , خلي يلمون بيناتهم ٤ بلابل جوزيات

ت.الشارع مكتوب سرعته ٦٠ او ٨٠ او ١٠٠ , اذا تجاوزت سرعة الشارع كذلك ٤ بلابل

ث.مخالفة قواعد السير على الطريق السريع

ج.اذا جاي رونك سايد امك داعيه عليك كذلك ٢٠٠

ح.سيارتك مضلله او بيها بردات ومصعد البردات , تدفع ٤ بلابل وتنحجز لحد ما تشيل البردات او التضليل

خ.هسه مشتري سياره وفرحان بيها والعينتن تتنسه على طرشي أبو الصلصه الحامض , وانت بعدك ممرقم السياره وشافك ابو غنضفر ,تذب ال٢٠٠ وبكيفك تجيب طرشي لو لا بقت يمك

ر.ابو الكوستر تذكرونه؟ هم باعها وجاب كيا بنكو حمل بيها جاملغ الأيمن مصبوغ,شايل حموله بالبدي وما مغطي خلي يحضر الـ ٤ بلابل

ز. البنكو مالته مكتوبه اقصى حموله كذا طن , بس العينتين عينه فارغه وحملها اكثر من الوزن المقرر او طلع الحموله من الجوانب او خله شيش التسليح يسحل ورا , ٢٠٠ الف

هـ. بعت سيارتك او اشتريت سياره ومحولتها خلال ٣٠ يوم, ٤ بلابل جوزيات

ع. اللوتي اذا سوه اكثر من عقد بيع لنفس السياره , ٤ بلابل جوزيات

وبالاخير ياريت اطبقون النظام لان حلو

ولدكول الحكومه فاشلة لو حرامية

شعليك بيهم؟

عليك بروحك”.

كلمات المفتاح:

ما هو نوع موادك المفضلة

جاري التحميل ... جاري التحميل ...
close

ما هو نوع موادك المفضلة

جاري التحميل ... جاري التحميل ...
Do NOT follow this link or you will be banned from the site!
عاجل عاجل